محمد ممدوح: اتجوزت فجأة دون أي تخطيط رغم إني بحب أخد قرارتي بتأني

حل الفنان محمد ممدوح ضيفًا على بودكاست كلام عائلي، الذي يقدمه الفنان صدقي صخر عبر يوتيوب، وتحدث عن قرار الزواج في حياته.

مؤكدا أنه أنه لم يتخذه قصدًا ولكن جاء بترتيبات ألهية، وقال “قبل ما أقابل زوجتي مكنتش عايز أتجوز ولا أي حاجة وكنت مركز في شغلي بس، والله حقيقي معرفش إيه خلاني أغير كل ده، مش هقولك إني اتخبطت فيها وبقيت هيمان، بس في حاجة أنا مش عارف اللي حصل”.

وتابع "فجأة القرار إتاخد وعايز أنفذه بأسرع وقت، رغم إني في العادي بحب أطلع الحاجات بالراحة ومعنديش حتة "الله يلا بينا"، فالمفروض حاجة زي دي بالذات مكونش متسرع، مش عايز حد يشتتني ولا عايز أبقى مسئول عن حد أنظمله حياته، لاء أنا دماغي مسليّاني لوحدها وفيّا اللي مكفيني فجأة حصل لقاء، خروجة كدة شوفتها واتكلمنا وهزرنا، واتقابلنا تاني مع نفس الشلّة ووقتها قولت بس خلاص عجبتني".

واستكمل “عرفت بقى أهلها وحكتلي حاجات عنها فلقيت نفسي بقول “أنا عايز ميرفت”، قصة حب حصلت في وقت قليل بس حقيقي كل يوم بكتشف إن ربنا سبحانه وتعالى وفّقني وإني أحسنت الاختيار، الحمد لله بحس طول الوقت إن الل أنا فيه دلوقتي بعد ترتيبات ربنا ودعاء أبويا وأمي ليا هي السبب فيه، يعني تنظيم الحياة وترتيبها هي اللي عاملاه”.

وكشف ممدوح عن نصيحة قدمها له والده يوم زواجه اكتشف صحتها بمرور الوقت، فقال “والدي قدم لي أهم النصائح يوم جوازي، قالي علاقتك بمراتك غير علاقتك بأمك خالص، متستناش العطاء اللي بتديهولك والدتك من مراتك، والنصيحة دي نورت عندي حاجات”، وتابع “العلاقة بيني وبين مراتي هي خد وهات غير العلاقة بالأم اللي هي بتدي بس ومش عايزة حاجة”.