فاطمة عيد: الست هي السبب في النكد وخيانة زوجها لها

تحدثت الفنانة فاطمة عيد عن استمرار زواجها 50 عامًا، والحب المتبادل بينها وبين زوجها على مدار هذه الأعوام، وكذلك كشفت عن سبب خيانة الرجل لزوجته مؤكدة أن الزوجة هي السبب.

وكشفت فاطمة عيد في لقاء تليفزيوني، سبب استمرار الحب بين الرجل وزوجته: "اللي يخلي الحب يستمر 50 سنة، الأدب بين الطرفين حتى لو الزوج غلط الزوجة المفروض تسامحه وما تغلطش زيه، لأن لو الزوجة غلطت في زوجها يبقى الدنيا خربت، هو راجل له القدسية بتاعته وله كيانه واحترامه وكل حاجة حلوة تخلي الواحدة تحطه فوق راسها".

وأضافت فاطمة عيد: "زوجي هو أخويا وحبيبي وصاحبي وكل ما أملكه في الدنيا هو زوجي، وطالما فيه احترام متبادل مفيش غلط بيبحصل، ومينفعش الست تقل أدبها على زوجها وتفرج عليه الناس، ولو أنا اتعصبت على زوجي في ساعتها بنصفى، ولو هو غلطان بييجي يبوس راسي ويقولي أنا غلطت في حقك سامحيني وما تزعليش مني".

وأكملت: "مينفعش الزوجة تقل بأصلها مع زوجها وترفع عليه قضايا أو دعوى خلع مهما كان زوجها وحش، مفيش داعي ننشر غسيلنا الوحش للناس ونغلط في بعض، والأدب أفضل من العلم ولو معاها 100 شهادة ومش مؤدبة تبلعهم وتشرب ميتهم".

كما أكدت فاطمة عيد أن الزوجة هي من تدفع الرجل للنكد موضحة: "الست هي اللي بتدفع الراجل للنكد والراجل مش هيبادر بالنكد من غير سبب، لازم الزوجة نرفزته ووصلته لكده وهو استحالة يزعق لها من الباب للطاق إلا إذا كانت هي بتستفزه وفيه ستات نكدية وأنا بقول شهادة هتحاسب عليها، زوجك هو كل ما تملكيه في الدنيا، لزومه إيه لما نزعل ننشر غسيلنا الوحش".

كما نصحت فاطمة عيد الزوجة بعدم الشكوى من زوجها لأي شخص حتى والدتها موضحة: "ما ينفعش تشكي لصاحباتها أو والدتها تبقى هبلة وعبيطة إنها تطلع أسرارها بره، إنتي وزوجك تالتكم ربنا، اشتكي لربنا ولو زعلتيه أو هو زعلك نصالح بعض بالعقل وكل واحد يعرف غلطه، وما نكررش الغلط تاني، لكن لما أشتكي لوالدي ووالدتي وصاحبتي يبقى أنا بكره ومش ممكن أعمل فيه كده ويحبني".

وأثارت فاطمة عيد الجدل، بشأن تصريحاتها عن سبب فشل العلاقات، قائلة:" الست هي السبب في إنها دفعته إنه يحب غيرها، وهي اللي مطفشاه، لو هي أخت وأم وخالة وعمة، ولو بتسايسه وبتكلمه حلو وبتعامله بما يرضي ربنا وملبية له كل طلباته عمره ما يبص لغيرها، ومفيش حاجة اسمها مولعة له صوابعها العشرة شمع يعني هو من الباب للطاق هيتنرفز عليها، النساء ناقصات عقل ودين".

وأضافت فاطمة عيد رأيها في تعامل الزوجة لزوجها: "بالعكس الرجال قوامون على النساء، الراجل راجل والست ست مهما كان كيانك لو عندك كنوز الدنيا ومعندكيش أخلاق يبقى ملعون أبو الفلوس اللي ما تسعدش صاحبها، ولو مش معاها إلا قوت يومها ومؤدبة وأخلاقها عالية وبتراعي ربنا في جوزها وولادها يبقى الحياة بتستمر وحاجة تشرح القلب الحزين".