بوسي: نفسي شيرين عبد الوهاب ترجع زي الأول

وجهت المطربة بوسي رسالة خاصة لـ شيرين عبد الوهاب. وقالت بوسي في تصريحات تلفزيونية: أنا مبحبش موضوع الألقاب ده أوي، كل واحدة ليها ستايلها وليها شغلها وليها صوتها اللي اتميزت بيه، كل واحد بيحب مطربة شايف أنها صوت مصر علشان كده حاصل خناقات دلوقتي، لكن السوق هو اللي يحكم مين رقم  واحد أو اتنين أو تلاتة مينفعش اقول على نفسي صوت مصر، مينفعش أقول عليكي صوت مصر.

كما وجهت بوسي رسالة خاصة لـ شيرين عبد الوهاب بعد أزمتها الأخيرة قائلة: شيرين بعشقها وبعشق صوتها، بحبها أوي ومستخسراها وبقول حرام وأنا مش بحب اتدخل في الحياة الشخصية لحد، لكن أنا هنا مش بكلمها كزميلة، أنا بتكلم وأقول ليها، محتاجينك ترجعي شيرين بتاعة زمان، شيرين اللي كانت مركزة في شغلها، شيرين اللي كانت بتحب مهنتها، اللي كانت بتحب الغناء وبتعمل حاجات حلوة تكسر الدنيا محتاجينها ترجع تاني، وربنا يعملها كل الخير.

كما أعربت بوسي عن سعادتها بعد نجاح أغنيتها الأخيرة قائلة: مكنتش متوقعة أن الأغنية هتطلع ترند لأنها أغنية دراما وكئيبة بس احنا شعب بيموت في الدراما أساسا، الأغنية اتعملت على قصة المسلسل لأنه كان بيحكي عن البنت اللي الظروف خدتها في سكة السوشيال ميديا، وبعدين اترمت على جوازة غصب عنها فهي كان ليها سيناريو خاص بيها

وحققت المطربة بوسي نجاحاً، بعد طرح أغنيتها الأخيرة التي تحمل اسم "زيه تاني"، حيث اتجهت إلى اللون الدرامى، ومن النادر أن تغنى بوسى بهذا الشكل بعد ما اعتدنا عليها بتقديم أغاني باللون الشعبي، ونالت إشادات كبيرة على مواقع التواصل الاجتماعى والسوشيال ميديا في تغيير جلدها، وشبهها البعض بمطربين كبار منهم أنغام وشيرين وغيرهم، وتخطت الأغنية حاجز تحقيق مليون مشاهدة على اليوتيوب، ومتصدرة حاليًا التريند منذ طرحها.

أغنية "زيه تاني" من كلمات حسام حسنى وألحان مدين وتوزيع وميكس وماستر يحيي يوسف، وقدمتها بوسى بشكل جديد ومختلف عن أغانيها السابقة، وتم تصويرها على طريقة الفيديو ريلكس.

وطرحت المطربة بوسى، مؤخرًا، أغنية جديدة بعنوان "مسولى وصبحوا" على موقع "يوتيوب" وجميع المنصات الموسيقية، على طريقة الفيديو كليب، والأغنية من كلمات تامر حسين، وألحان عزيز الشافعي، وتوزيع وميكس وماستر جلال حمداوى، والكليب من إخراج اشرف رمضان.

وكانت المطربة بوسى قد طرحت مؤخراً أغنية "ارقص معايا" على "يوتيوب" ومواقع التواصل الاجتماعى، وذلك على طريقة الفيديو كليب الذى قام بإخراجه محمد القاضي.

والأغنية من كلمات هاني عبد الكريم، وألحان مدين، وتوزيع يحيي يوسف، وميكس وماستر هاني محروس.