محمود سعد يوجه نصائح إلى أولياء أمور طلاب الثانوية العامة

وجه الإعلامي محمود سعد نصائح لطلاب الثانوية العامة والآباء، وذلك قبل ساعات من إعلان النتيجة.

نشر محمود سعد فيديو له على حسابه الشخصي بموقع التواصل الاجتماعي تبادل الصور والفيديوهات “الانستجرام: ”جبت 56% وأحمد حلمي 50%، الثانوية العامة لا أول الطريق ولا آخره.. الثانوية العامة مش آخر الدنيا يا جماعة، وياما ناس جابوا مجاميع صغيرة وحققوا نجاحات كبيرة جدا، والأمثلة كتير وموجودة معانا".

وتابع محمود سعد:" ابنك لما يجيب مجموع صغير مش نهاية العالم، ولما مينجحش مش نهاية العالم.. أنا نجحت أنا وصحابي حوالي 20 واحد، الدولة عملت اوكازيون ونجحنا كلنا، وانا امتحنتها سنة واحدة، وغيري امتحنوها 3 و4 سنيين، ومع ذلك حققوا نجاحات كويسة جدا في حياتهم".

أضاف : "كلنا عارفين أن المجاميع الكبيرة بتدخل كليات زي الطب والهندسة والاقتصاد والعلوم السياسية، وفي الآخر ممكن ميحققوش نجاحات أو يبقى أماكن متواضعة، وفي ناس تانية ممكن متنجحش في الثانوية أو متاخدهاش من الأساس وتحقق نجاحا كبيرا، على سبيل المثال الشاب اللي عمل مشروع الفراخ السوداء".

واستكمل: "مش كل إنسان مؤهل إنه يكون متفوقا في الدرجات، لا ممكن يكون متفوق في حاجات تانية كتير، وعلى سبيل المثال أنا جبت 56%، ودخلت كلية آداب قسم تاريخ، واشتغلت في الصحافة ومكنتش أعرف إني هنجح فيها، بص على الممثلين ومجاميعهم في الثانوية، فمثلا أحمد حلمي جاب 50%، ومبقاش ممثل ناجح وبس، بل بقى ممثل مثقف وواعي، وغيره كتير".

اختتم حديثه: "دي وصمة عار في الأمة، كونهم مش بيبذلوا مجهود مع أولادهم يعرفوا هم بيحبوا إيه، ويتشغلوا على كده وينموه، بنتك شاطرة في الطبخ مثلا نمي مهاراتها هتبقى شيف كويس جدا.. بالراحة شوية على نفسنا، والثانوية العامة مش هي نهاية الطريق ولا حتى بداية الطريق".