مش هتوجع على حيطان.. شمس البارودي تنفي استغاثتها بعد تطبيق قانون الإيجار القديم

تصدرت النجمة المعتزلة شمس البارودي مؤشرات ترند جوجل خلال الساعات الماضية، وذلك بعد نفيها استغاثتها عقب توقيع قانون الإيجار القديم، مؤكدة أنها لم تطلب المساعدة من أي شخص.

وعلقت شمس البارودي على التصريحات المنسوبة إليها حول قانون الإيجار القديم من خلال منشور لها عبر صفحتها على موقع فيسبوك، وكتبت:  
"عيب وكذب، والله اللي بيحصل ده! أنا ما استغثتش بحد، وكنت بعلّق على صفحتي بكلام كله ضحك، وبحكي عن قطتي.. فضلت الصحافة تتصل بيا، وأشخاص بالإسم، وأنا مش عايزة أرد.. يا جماعة سيبوني في حالي، اللي فيا مكفيني.. ومافيش أغلى من اللي راحوا، وأنا لا أبكي على دنيا كلنا حنسيبها، من الأمير للغفير".

وأضافت:  "كل ما في الدنيا من مال وجاه ومُتع لا يساوي ظفر ابني أو زوجي اللي راحوا، والصحافة أخذت فقرة من صفحتي كنت بتكلم فيها عن نفسي، وعملوا منها عنوان كاذب.. هل ممكن أقول مصيري مجهول؟ إيه التخاريف دي يا ناس؟ كلنا ميتون وحنتركها عاجلًا أو آجلًا.. وربنا يهني الجميع، المالك والمستأجر.. مش بيقولوا (ربنا يهني سعيد بسعيدة) خلاص، أمر واقع لا يهز لي شعرة على دنيا سنفارقها، وماحدش يقولي كلام أنا لا أستغيث إلا بالله، وقلبي عمره ما حيتوجع على حيطان".

وتابعت:  "أنا سبت شقة بإرادتي وبمزاجي في إسكندرية، وصاحب البيت مشكور قالي خليكي، وأنا رفضت. فعيب تقولوا كلام وعناوين غلط، ما تخرجوش الكلام من سياقه بعناوين غير صحيحة.. والله عيب، والله عيب! حنفضل نقول عيب على حاجات كتير.. وبهدي للجميع أغنية صفاء أبو السعود: ارقصوا وغنوا وافرحوا واتهنوا، جانا العيد أهو جانا العيد.. حلو كده.. بتعجب، والله قال قلبي موجوع!’"

وأكملت:  "يا جماعة، أنا قلبي اتوجع يوم ما فقدت ابني عبدالله، وبعده بأقل من سنتين أبوه، شريك عمري وونسي وسعادتي.. بإذن الله ألقاهم في الجنة، يا رب نكون من أهلها.. وأنا بعتذر للإخوة الصحفيين، أكيد جالهم أمر: شوفوا شمس البارودي حتقول إيه؟"

واختتمت حديثها قائلة:  "حبوا يضيفوا تحبيشة من عندهم بعنوان (وجع واستغاثة)، على طريقة أفلام الفنانة الجميلة نادية الجندي، تحابيش لزوم النجاح ولفت النظر، أرجوكم ما تقولوش كلام، يعني ينفع كده؟ بعد صلاة الفجر بمسك مصحفي وأقرأ الورد بتاعي، قلت أبص على رسائل التليفون أطّمن على ولادي، لقيت صفاء، أختي، مضطلعة على آخر الأخبار، ومتطوعة بنشرها على جروب الأخوات العملية على الواتساب، وهي اللي نزلت خبر التوقيع بالصور، ما شاء الله، صافي تنفع مراسلة صحفية، وبتجيب لنا أحدث الأخبار المتداولة على السوشيال ميديا.. شكرًا يا صافي."