مأساة أم مصرية وابنتها تخلي عنها زوجها في الإمارات

تداول رواد مواقع التواصل الاجتماعي، منشور استغاثة لسيدة مصرية تدعى ميار نبيل، تروى تفاصيل مأساوية عن قسوة زوجها محمد السيد علي حشيش، بعد أن تركها وابنتها الرضيعة في دولة الإمارات دون مأوي، أو أي وسيلة حياة داخل شقتهم، بسبب وجود خلافات زوجية بينهما.

اتجوزت على كلمة شرف واتغدر بيا من أول يوم

تقول ميار: "أنا اتجوزت على اتفاق واضح بينه وبين والدي، إني هعيش معاه في الإمارات، ومش هنحتاج مسكن زوجية في مصر غير شقة على الطوب الأحمر لأننا مش هنقعد فيها، وبعد الفرح سبني عند أهلي 3 شهور كاملة، وده كان أول نقض للاتفاق".

وأضافت: سافرت معاه الإمارات ولما وصلت اكتشفت الحقيقة، مافيش شقة ولا سكن مستقل، وأهله كلهم عايشين معاه، ومن أول يوم بدأت المشاكل، لأنه ماعرفش يتحمل مسؤولية، ولا مسؤولية زوجة ولا بيت.

استحملت علشان بنتي.. لكن الهروب كان رده لكل طلب

وتابعت ميار: “ربنا رزقني ببنتي، وكانت هي السبب اللي خلاني أتحمل كل شيء، كل ما أطلب منه نوضّب شقة الزوجية في مصر، يرفض، وكل ما يحصل خلاف، يهرب ويقطع التواصل تمامًا، ويسيبني أنا وبنته شهور من غير حتى سؤال”.

اضطريت أسافر وراه عشان أجيب حق بنتي

واستكملت: سافرت الإمارات على نفقة أهلي، ولما عرف إني وصلت، مجاش ياخدنا رغم إني على ذمته. رفعت عليه دعوى نفقة زوجية ونفقة لبنتي، وبعدها اضطريت أرجع على مسكنه لأنه ماكنش معانا فلوس نقعد برا كتير.

جلسة صلح ويمين كاذب

وأكملت ميار: في جلسة الصلح قدام المحكمة، اتعهد إنه هيصرف علينا، وهيرجعني وبنتي لبيت في الإمارات، وأقسم بالله إنه هيفتح صفحة جديدة، وأنا والله سامحته من قلبي عشان بنتي، لكن الحقيقة إنه كان بيخطط من ورايا عشان يهرب.

صحيت لقيت نفسي مخالفة إقامة ومحبوسة في ظلمة شقة بلا مياه

وأضافت: تاني يوم مباشرة لغى إقامتي وبقيت مخالفة، ماقدرش أخرج ولا أتحرك، قفل الأوضة اللي فيها الحمام وحاجتي أنا وبنتي.

قطع الكهرباء والمياه والغاز والإنترنت

ساب بنتي الرضيعة 3 أيام تنام في الضلمة وأنا مش لاقية نقطة ميه، كلمته؟ تليفونه مقفول، لحد ما بعد وقت طويل بعت رسالة وقالي: أنا نزلت مصر ومش راجع.

أناشد السفارة وحكومة الإمارات: أنا بموت أنا وبنتي

وناشدت ميار: أنا حاليا محبوسة في شقة مظلمة، أنا وبنتي، من غير أكل، من غير ميه، من غير كهربا، ابنتي رضيعة وأنا بشوفها بتنهار قدامي ومش قادرة أعمل حاجة، ساعدوني وأنقذوا بنتي، أنا مش هسيب حقها.

إقرأ أيضًا:

وفاة معلمة وإصابة 21 تلميذًا في انقلاب أتوبيس بإسنا

مصرع 3 أشخاص وإصابة 9 آخرين في انقلاب ميكروباص بالمنيا

إصابة 9 أشخاص في حادث تصادم سيارتين بالإسكندرية