والدة الطفلة أيسل ضحية الاعتداء الجنسي تناشد الرئيس بتعديل قانون الأحداث

“مش عارفة أبتدي منين…”، بهذه الكلمات بدأت الأم حديثها عن ابنتها، الطفلة أيسل ضحية الاعتداء الجنسي على يد طالب داخل حمام السباحة بقرية سياحية بالعين السخنة.

كان حلمها تبقى دكتورة

تقول الأم: دى أيسل بنتي.. البنت اللي كل حاجة في شخصيتها كانت رائعة.. كان كل هدفها تطلع دكتورة وتدرس طب في ألمانيا، وبعدين تعمل مركز طبي للغلابة

حفظت القرآن وشالت مسؤولية بيتها

وتضيف الأم: “أيسل كانت شاطرة جدًا، حافظه قرآن، وخطها روعة، ومثقفة ومؤدبة وبتحب صحابها وأهلها، كانت أشطر واحدة في مدرستها، رغم إنها عندها 7 سنين بس كانت بتشيل معايا مسؤولية البيت كله، وكانت أحن واحدة، ومربية أختها الصغيرة".

بصوت مكسور تكمل الأم: “إيه ذنبها؟ عملت إيه؟ مش قادرة أستوعب إنها ماتت على إيد واحد عديم التربية.. أمه وأبوه سايبينه للمواقع الإباحية".

اعتداء وقتل داخل حمام السباحة

وتروي الأم تفاصيل يوم 17 أغسطس 2023، قائلة: “كنا في قرية استيلا سي فيو في العين السخنة.. كان يوم خميس الساعة 4 العصر، بنتي بتلعب في حمام السباحة مع صحبتها، وأنا واقفة قدامها على البسين، أختها عايزة تروح الحمّام.. اتحركت دقيقة واحدة بس عن المكان".

وتتابع باكية: “القذر اللي كان في نفس البسين كان بيراقبها.. أول ما اتحركت، نط في المية، شدها من تحت، وكتم نفسها.. جالها سكتة قلبية وبعدين عمل فيها اللي مستحيل أقدر أقوله، بس لازم أقول الحقيقة: اعتدى عليها بإنه دفع عضو ذكري من وراها وبنتي ماتت".

حياتنا تحولت لكابوس

وأستكملت: من يوم 17/8/2023 حياتنا وقفت، أنا دورت على حق بنتي في كل اتجاه.. السويس، الإسماعيلية، مكتب النائب العام، عشان نكون بعيد عن أي ضغط، والجانب الوحيد اللي خلص إن المجرم اتحكم عليه 15 سنة، التزامًا بالقانون، لأنه حدث بس ده مش عدل".

أمه هتسفره يكمل تعليمه برا

وتقول الأم: “رحت المدرسة بتاعته وهى مدرسة إنترناشونال اسمها نفرتاري، مدير المدرسة رفض يعمل سحب ملف وقالي خلاص هو دخل السجن، وكإن اللي حصل بسيط، وأنا متأكدة أن المتهم هيطلع من السجن وأمه هتسفره يكمل تعليمه برا زي أخوه ويعيشوا عادي، هما عندهم قرايب في الرقابة الإدارية وهم مستريحين.. وإحنا حياتنا اتحولت جحيم".

مناشدة الأم للرئيس السيسي بتعديل قانون الأحداث

وبألم بالغ تقول الأم: “أنا بناشد سيادة الرئيس عبدالفتاح السيسي.. كأب قبل ما يكون رئيس، أرجوك يا فندم.. ساعدونا نغير قانون الأحداث، اللي يقتل أو يعتدي بالشكل ده لازم يتحاكم إعدام، كبير كان أو صغير".

وتكمل:“أنا عارفة القوانين مرتبطة ببروتوكولات دولية، بس حضرتك بيدك حكم بلد فيها 108 مليون، أكيد هتقدر، أنا بنتي خلاص مش هينطبق عليها أي قانون، بس حرام أطفال تانية يحصل فيها كده.”

وتختم بكلمات تكسر القلب: “بقالي سنتين ونص بدور على حق بنتي النفس أرتاح. نفسي يكون في رحمة بينا".

إقرأ أيضًا:

والدة إحدى ضحايا المدرسة الدولية تروي تفاصيل مرعبة عن وقائع الاعتداء على الأطفال

القصة الكاملة للطفلة حور بعد محاولتها الانتحار داخل المدرسة بسبب التنمر

أميرة الدهب بعد الفيديو المفبرك: سمعتي خط أحمر وملاحقة المتورطين أمام مباحث الإنترنت