سامر أبو طالب يكسر صمته ضد طليقته رنا سماحة: «محروم من ابني 5 شهور عشان العند وسأرد بالقانون»

وجه الفنان سامر أبو طالب رسالة مؤثرة للغاية إلى نجله "مالك"، كشف من خلالها عن تفاصيل قاسية لخصومته مع مع طليقته الفنانة رنا سماحة، والتي تجاوزت الجدران المغلقة لتصل إلى ساحات المحاكم ومنصات التواصل الاجتماعي.

عبر حسابه الشخصي على موقع «فيسبوك»، استهل سامر أبو طالب رسالته العاطفية بكلمات تنبض بالحب والحنان الأبوي الخالص تجاه نجله، حيث كتب قائلًا: «مالك حبيبي وصاحبي وابني وأول فرحتي وروح قلبي، علشانك أستحمل الدنيا تشيل وتحط فيا، مش بس يتشهر بيا ويتقال عني كلام من أوقح الكلام اللي ممكن يتقال عن بني آدم زيي، معروف عنه الاحترام والكرم وبيتقي ربنا في كل شيء، وما بيظلمش ولا بييجي على حد، الحمد لله، وربنا يديمها نعمة».

وفي هذا السياق، تابع أبو طالب رسالته بحرقة قائلًا: «عايز أقولك يا مالك إني ما كنتش أحب تكبر تلاقي العلاقة كده بين أمك وأبوك، واصلة للمحاكم والكل بينشر ويعيد ويزيد فيها.. وعشان إيه؟! عشان أغنية تطلع تريند!! ولا شوية دعاية أقل ما يقال عنها إنها دعاية رخيصة شو مالوش قيمة».

وسلط الفنان الضوء على تفاصيل مؤلمة تخص ابتعاده القسري عن ابنه، موضحاً أنه التزم الصمت التام طوال الأشهر الخمسة الماضية، محروماً من رؤية نجله بسبب العناد واستحواذ الأم على الحضانة، مع تحمل إهانات متكررة له ولمحيطه العائلي.

 وأضاف  «أنا من بداية الأزمة وأنا مقرر إني عمري ما هعمل فيك كده، وهفضل ملتزم الصمت تمامًا، لأني مش من الشخصيات اللي بتحب الدوشة والمشاكل والقيل والقال والفضايح ورمي الناس بالباطل.. وسكوتي عن حقي وشتمي وإهانتي أنا وأسرتي ومراتي وأبويا وإخواتي في اللي فات ده كله، والتزامي الصمت، كان عشانك يا حبيبي، عشانك أنت وبس يا مالك، محروم منك، وبقالي 5 شهور مش بشوفك عشان بس العند، ولمجرد إن (الحضانة مع مامتك)، وبرضه ما تكلمتش وما حاولتش أعمل شوشره، وفوضت أمري لله في أموري كلها، وقلت إن شاء الله ربنا قادر يغير الأحداث للأحسن وللأصلح ليك يا مالك. وبرضه سكوتي عشانك أنت».

واختتم رسالته : «علشانك هوقف اللي بيحصل قبل نهاية مسلسل أب ولكن اللي إحنا فيها دي، ردي هيكون رد قانوني على كل الإشاعات ومحاسبة كل من شارك فيها، أصل أنا مش محتاج أعمل تريند على حساب ابني، اللي هيكبر يلاقي أمه بتشهر بأبوه بالكذب وبدون وجه حق، وفي الآخر تقولك دي لعبة محامي وأنا ماليش دعوة وكأنها بأعصاب باردة بتنقذ نفسها، لكنها بتضيع ابنها».