مش وسيم كفاية.. إسلام إبراهيم يكشف سبب انسحابه من بطولة مسلسل جديد

حل الفنان إسلام إبراهيم ضيفًا على الإعلامية فاطمة مصطفى في برنامج الراديو بيضحك المذاع على الراديو 9090.
وخلال اللقاء فجر إسلام مفاجأة عن سبب عدم مشاركته في موسم دراما رمضان 2025، فقال: "كان في مشروع لرمضان وللأسف محصلش نصيب، كنت مترشح لبطولة لكن البطلة شافت إني مش أمور كفاية، والله العظيم ده حصل فعلا فانسحبت بهدوء".

أعلى نسبة مشاهدة 2:
كما كشف إسلام إبراهيم عن توقف العمل على الجزء الثاني من مسلسل أعلى نسبة مشاهدة الذي عرض الجزء الأول منه في رمضان 2024 وحصل على نجاح جماهيري كبير، وأكد ان التوقف لم يحدث بسبب حمل سلمى أبو ضيف بطلة العمل كما اعتقد البعض.

وعن السبب الحقيقي للتوقف قال "والله مش عارف المفروض أقول ده ولا لاء، بس المخرجة ياسمين أحمد كامل طلعت بفكرة مرعبة قالت الفكرة زي القنبلة.. لأن فعلا مصايب السوشيال ميديا مبتخلصش وكل يوم بنصحى على كارثة، فاللي معتقد إن اللي حصل في الجزء الأول السقف، لاء احنا لسه في أول دور".
وتابع "مش هينفع أحرق طبعا القصة، بس لما سمعنا الفكرة كلنا قولنا اه فعلا ولو حصل كذا هتبقى جامدة جدًا، بس فجأة المؤلفة قالت "لا والله أنا مش متحمسة" رغم إن شركة الإنتاج كانت متحمسة، والمخرجة متحمسة، احنا كممثلين متحمسين جدًا لأن اللي قالته ياسمين هيودي الشخصيات كلها في حتة تانية خالص، حاجة مرعبة بجد، ولكن الموضوع نام شوية، نام بقى هيتعمل مش هيتعمل معرفش، ولو ياسمين مؤلفة العمل سمعاني دلوقتي بقولها لازم تعملي جزء تاني من أعلى نسبة مشاهدة".
مسلسل أعلى نسبة مشاهدة بطولة سلمى أبو ضيف، ليلى أحمد زاهر، محمد محمود، إنتصار، فرح يوسف، تأليف سمر طاهر، إخراج ياسمين أحمد كامل.