ويجز يهاجم رامي صبري: أنت رقم 19 مثلا.. وبعيد أوي بجد

خرج الفنان الشاب ويجز عن صمته، ونشر عبر ستوري حسابه الرسمي على موقع التواصل الاجتماعي إنستجرام مقطع فيديو يرد فيه على الفنان رامي صبري.
وانتقد ويجز حديث رامي عنه دائمًا في البرامج، فقال:  "بتكلم على فنان فاكر ان عنده صلاحية يطلع يتكلم في أي وقت على أي حد، والناس تسمع وتسكت يعني، الفنان ده اسمه رامي، رامي ده بقى كل لما يقعد كده 4 أو 5 شهور يزهق، يطلع يتكلم في التلفزيون على بتوع الراب والهيب هوب وكده، طب انت بتتكلم امتى على بتوع البوب اللي انت منهم، يعني هتتكلم امتى على فنك ومجالك وكده".
وانتقد ويجز تقليل رامي من مكانة مطربي الراب، فقال: "أنا شايف إن أنت متفهمش في الراب ده حاجة ولا بتفهم الكلام بتاعه، زي ما أنت قولت قبل كده، فمش هتعرف تعمله، فأنا راجل مثلا لو لقيت حد بيعرف يسوق عجلة وأنا مبعرفش بحترمه.. ليه؟ علشان هو عمل أكيد حاجة غير اللي أنا عملتها، اشتغل على نفسه في حاجة انا مشتغلتش على نفسي فيها".
واستكمل: "أنت مبتقدرش الفنانين دول، أنت شايفهم كده بيحاولوا يوصلوا لدرجة أنت فيها، في حين إنهم بالفعل معديينك، أنت مش رقم 2 يا رامي، أنت رقم 19 مثلاً أنت بعيد اوي بجد".
وختم ويجز حديثه بالإعلان عن موعد أغنيته الجديدة، فقال: "جماعة استنوا أغنيتي الجديدة إن شاء الله يوم 27، أغنية مش هقولكم هي عبارة عن ايه لاء.. أستاذ رامي بقى ممكن يقولنا، يشرحلنا بقى بعد ما  الأغنية تنزل، يشرحلنا هي عبارة عن ايه لو فهم".

يذكر أن أغنية “العربي أصلي” هي أخر أغنيات ويجز التي طرحها على يوتيوب، وحققت الأغنية أكثر من 3 مليون مشاهدة خلال شهر.