محمد عبد الرحمن: جالي تروما بسبب حكايات الأهالي

حكى الفنان محمد عبد الرحمن، عن مواقف كوميدية تحدث معه حاليًا بسبب قصص الأهالي القديمة عندما حل ضيفًا على الإعلامي إبراهيم فايق في بودكاست فايق ورايق.
فقال: "عارف أنت القصة اللي كانوا دايمًا بيحكوهالك ويقولك عارف حتة الأرض دي اتعرضت على جدك بشلن، وقال لاء أنا مش عايز وجع دماغ، كانت أمي الله يرحمها تقولي الأرض اللي ورانا دي والأرض اللي قدامنا والأرض اللي كذا كنت أقوله ناخدها ويرفض يقولك يعني هنعمل بيها ايه، الفلوس كتير والمنطقة مفيهاش صريخ ابن يومين". 
وتابع، "مدينة نصر كان المتر بريال، والمطرية عندنا كان المتر بنص جنيه ولا بربع جنيه ساعتها، دول كانوا رقم أيام جدي، ويقولك ايه الصحرا دي يطلع علينا ديب ياكلنا ولا حاجة، ما يطلع علينا ديب هيطلع منين يعني،  من جنب السراج سيتي مول".
واستكمل: "في النهاية خدنا بيت في المطرية ويقولك ما احنا خدنا حتة الأرض اللي بنينا عليها البيت دي، ايوه ياحاج كان هيجرا حاجة لو كنتوا اشتريتوا الحاجات اللي حواليكم كمان، وعملولي أنا تروما لدرجة إني عادي جدًا أروح اخد بيت في السنبلاوين وأقول لنفسي لا هاخده بقى وهيبقى حاجة".

اقرأ أيضًا: مش وسيم كفاية.. إسلام إبراهيم يكشف سبب انسحابه من بطولة مسلسل جديد
وحكى محمد عبد الرحمن عن بداية مشواره الفني، وكيف بدأت صداقته بالفنان مصطفى خاطر، فقال: “دخلت فريق تمثيل كلية حقوق عين شمس، ومصطفى خاطر أول واحد قابلني وكان بيتخرج وأنا كنت لسه في أول سنة، فتحلي الباب وقولتله أنا عايز أدخل فريق التمثيل، قالي آسفين مفيش مكان جوه تعالى السنة الجاية”.

وتابع "قولتله طب أدخل أتفرج حتى قالي لا، تخيل كان هيقتل موهبة عاملة إزاي أو قتل كام موهبة، بعدها روحت قصر ثقافة المطرية وقابلته تاني هناك فقولتله ازيك، وأنا طبعًا مش طايقه، ولما بقيت في الفريق بقينا أصحاب جدًا وبقى معانا محمد أنور وحمدي الميرغني”.