بسبب موبايل.. عمرو وهبة يحكي قصة تعرفه على زوجته قبل 19 عام

حل الفنان عمرو وهبة وزوجته سلمى، ضيوفًا على الفنانة إسعاد يونس في برنامجها “صاحبة السعادة” الذي يعرض على قناة Dmc.
وتحدث عمرو وسلمى عن قصة تعارفهما، فقالت زوجته "أخو عمرو عنده محل قدام بيتنا بس احنا مكناش بنتعرف على جيران، موبايلي وقع في المايه وأنا في ثانوي فروحتلهم وكان عمرو اللي موجود، لأن أخوه كان في شهر عسل، فأنقذ لي الموبايل وقالي ده رقمي لو محتاجة حاجة، وإن شاء الله تليفونك مش هيبوظ تاني، والتليفون اتصلح وكملنا احنا".

وأكمل عمرو القصة فقال "هو كان في اهتمام مبالغ فيه تجاهها من ناحيتي، جاتلي مرة هي ومامتها وأختها قالولي عايزين تليفون معين وهو مش عندي في المحل، قولتلهم عندي هجيبهولكم روحت قافل المحل ورايح محل تاني بعيد وشاريه ورجعت ادتهولهم بنفس سعره، بس كانوا فاهمين إنه فعلا عندي وإني شهبندر التجار واتصرفت، فكان في اهتمام، وأختها بتيجي تلعب عندي على الكمبيوتر وأنا سايبها علشان هي هتعدي تاخدها".

اقرأ أيضًا: ياسمين رئيس تطلق حملة للتبرع بفساتين الزفاف وأسماء جلال تنضم لها
وتابع عمر "في بداية تعارفنا مكنش في مخططات بالجواز لأننا كنا صغيرين، هي يا دوب بنت الجيران، أهلها ناس لذاذ ظراف بيعدوا عليا كتير في المحل، والعلاقة فضلت حلوة وأنا كنت صديق لأسرتهم، بس كان باين إني بلطّف، واتقدمتلها وأنا في تانية جامعة لأني كنت حابب لما أتقدم أقولهم سلام عليكم أنا كبير وبشتغل وفي فلوس أعرف أتقدم بيها، ده كان مبدئي".
واستكملت سلمى “أنا أصلا عيلتي كانت أنا ومامتي وأختي بس، بابا مش معانا طول عمري كده، ففكرة الراجل في حياتي مكنتش موجودة، فلما ظهر عمرو حسيت إن في راجل بنرجعله في حاجات، وواقف معانا، فالحب كان كده، إن فيه ضهر معايا”.
وختم عمرو بقول "السنة دي بقالنا 15 سنة جواز وقبلها 4 سنين خطوبة ومعرفة، فهى أول حد في حياتي وهي مخدتش خبرات وأول حد في حياتها كنت أنا".