كزبرة: نفسيًا مبقتش قادر ولما بعمل حاجة حلوة مبقتش أعرف اتبسط بيها

الأحد، 08 ديسمبر 2024 02:10 م

ريهام أبو الخير

مطرب المهرجانات كزبرة

وجه الفنان الشاب أحمد بحر الشهير بـ كزبرة، رسالة صريحة لجمهوره عبر "ستوري" حسابه على إنستجرام، ردًا على الانتقادات التي يواجهها شخصيًا وعلى الفن الذي يقدمه.

بدأ كزبرة كلامه بشكر الجمهور على رسائلهم بعد طرح فيلم الحريفة 2 فكتب "أول حاجة الحمد لله على نعمة ربنا عليا وحبكم ورسائلكم الجميلة اللي بتوصلني ورد الفعل الجميل منكم على فيلم (الحريفة 2)، كلام كتير نقسي أقوله وأعبر بيه ليكم، في كلام تاني مهم محتاج أقولهولكم".

وأشار كزبرة إلى أنه يعاني نفسيًا من المحاولات المستمرة للتقليل من شأنه، مؤكدًا أن نجاحه غالبًا ما يقابله هجوم يهدف إلى تشويه صورته، فكتب “والله يا جماعة الكلام ده نفسي أقوله من بدري، بس حاسس إن ده وقته، أنا مش عارف ليه، كل لما أنجح في ناس بتحاول تطلع صورتي وحشة، أنا بجد نفسيًا مابقتش قادر، وبقالي فترة كبيرة كل لما أعمل حاجة حلوة مبقتش عارف اتبسط بيها، ونفسيا مش أحسن حاجة”.

وتابع “ربنا العالم الواحد كل اللي يهمه إنه يقدم حاجة تعجبكم وتسعدكم، بس في ناس بتتعامل مع اللي بيقدم حاجة كوميدية على أساس إنه شخص تافه مش موهوب، والواحد بيتعامل بطبيعته ومش بيتصنع، بتحاولوا تشوفوا ازاي تطلعوا في عيب قدام جمهوره وأخواته اللي بيحبوه، زي ان يتنسب لي كلام ماقولتهوش، أو يتقلل مني بحاجات قديمة عملتها، وأحيانا بتوصل للتريقة على اسمي، بمجرد ما يعمل حاجة حلوة وتعجبهم”.

واستكمل "أنا مش عارف ليه ودا السبب اللي بيخلي إنسان طيب أول ماينجح يتحول لإنسان عنده نقص وعنده حرب مع كل اللي حواليه، زي ناس كتير نجحت وبقوا بيتعاملوا بنرجسية عشان يعرفوا يتعاملوا مع الواقع، فأنا يا جماعة مش عايز أوصل للمرحلة دي، أنا عايز ابقى إنسان طيب وفي حالي واشتغل على نفسي واقدم لكم فن يعجبكم ويبسطكم، هو دا هدفي، فبلاش تتعاملوا مع الواحد بأسلوب هو مش حبه".

وختم كزبرة حديثه بستوري ثالثة كتب فيها "في الأخر في قصص نجاح ملهمة كتير تستاهل الناس تتكلم عنها، ممكن تفيد، يمكن أكتر من قصة أحمد بحر كزبرة وإزاي وصل هنا، هكون أسعد كتير لو كان التركيز على شغلي مش على شخصي، سواء بالإيجاب أو بالسلب، عشان أتعلم وأطور من نفسي في اللي جاي".

الرابط المختصر