شقيق إلهام شاهين: «أختي جريئة وصدامية.. والناس مش بتشغلني بسببها»

كشف الفنان أمير شاهين شقيق الفنانة إلهام شاهين، عن طبيعة العلاقة بينهما قائلا: «فيه ناس عندها مشاكل مع أختي.. ومبتحبش تشغلني وده اللي معطلني».

وأضاف «أمير»، خلال لقائه ببرنامج «شاي بالياسمين»، الذي تقدمه ياسمين الخطيب بقناة «النهار»: «إلهام بتعملي مشاكل كتير جدًا، وأنا دايمًا قلبًا وقالبًا معاها، أنا عارف إنها صريحة جدًا ومبتخافش لأنها بتتكلم وهي معاها الحق وهي جريئة جدا في التصريحات»، وتابع: «هي ست شجاعة وجريئة جدا في حاجات كتير، ودايما بقولها على حاجات كتير علشان ممكن تتفهم غلط أو مبتعجبش بالفكرة اللي بتطرحها».
 

ولفت إلى أنها «في هجومها على الشيخ الشعراوي مؤخرا، قلت لها حتى لو فيه جزء من الحقيقة مش لازم تطلعي تقولي ده وتحتفظي بيه لنفسك، علشان هو شيخ جليل والناس كلها بتحبه وعنده قاعدة شعبية كبيرة ولكن هي حرة في قناعاتها الشخصية، ولكنها شخصية صدامية».

وقال «أمير»: «أنا اتأخرت جدا في الزواج لأسباب كتير لأني أصلا كنت ضد فكرة الارتباط لعدم التقيد، وطول عمري كنت شايف الموضوع أنه تقيد»، وتابع: «أي حد من أصحابي كان يقول ليا زمان أنا هاتجوز كنت أقوله هو أنت مجنون ما إحنا مبسوطين، أنا كنت ضد الزواج».

واستكمل: «دلوقتي بقول الزواج لطيف مش وحش، ووفاة ميرنا المهندس عملت لي عقدة وكنت المفروض اتجوزها بس القدر مأمهلناش ومحصلش نصيب وقعدت فترة علشان اتخطى الموضوع ده يمكن سنين».
 

واستطرد: «أنا كان عندي علاقات كتير وقصص حب كتير داخل الوسط الفني وخارجه، وكان فيه فنانة بيني وبينها قصة حب».
 

وقال: «اللي غير فكرتي عن الجواز الأولاد، دلوقتي عندي مراد سنتين ونص ومريم سنة، إحساس تاني خالص لم خلفت، والعيال الإحساس الوحيد اللي عمري ما كنت أتخيله».

وأكد شقيق إلهام شاهين: «لو حد من أولادي عندهم الموهبة وعايز يمثل معنديش مشكلة وأرحب جدا بدخولهم عالم التمثيل، بس مراد ابني باين عليه ممثل في نفسه».
 

وتابع: «اللي شدني في مراتي (منة) إننا قعدنا صحاب 10 سنين قبل الزواج، وكنا بنخرج على طول وفيه بيننا علاقات أسرية وعارف والدتها والعائلة كلها، وفضلنا أصحاب كتير وواخدين على بعض والصداقة تحولت لحب بالصدفة البحتة، وكانت بتشوف معايا صاحبات ليا وكل حاجة وعارفة عني كل حاجة».