نهى عابدين: الطلاق صعب بس ممكن يكون صحي

تحدثت الفنانة نهى عابدين، عن مشاركتها في مسلسل العتاولة، الذي قدمت خلالة دورا رائعا تركت به أثرا كبيرا في حياة المشاهدين، وذلك خلال السباق الرمضاني الماضي 2024.

وقالت نهى عابدين خلال حوارها مع الإعلامية إنجي علي، على نجوم FM: مش حاسة أن خطواتي الفنية اتأخرت، ومخوفتش من دوري في مسلسل العتاولة، ولكن طبعًا مفيش حد بيسلم من الانتقادات على السوشيال ميديا، أنا ممثلة ومؤمنة باللي بقدمه وبالتالي مبلتفتش للانتقادات، للأسف الناس بقت تربط بين الممثل والشخصية اللي بيقدمها على الشاشة والموضوع ده غريب بصراحة.

وأضافت نهى عابدين: العتاولة كان رائعا وحقق نجاحا كبيرا، وسعدت جدًا بتجربتي مع الفنان طارق لطفي ده تاني تعاون بينا، والمسلسل كان مليان نجوم وأنا بحب البطولات الجماعية لأنها بتدي ثقل للعمل ومبتركزش على شخص واحد.

وتابعت نهى عابدين: أنا موجودة في الجزء الثاني من العتاولة، وهو لسه في مرحلة الكتابة وربنا يوفقنا في أي خطوة جاية على مستوى العمل.

نهى عابدين: الطلاق ممكن يكون صحي 
كما كشفت الفنانة نهى عابدين، عن أسعد وأسوأ لحظات في حياتها، قائلة: أسعد لحظة في حياتي يوم ما خلفت ابني أيمن، هو واخد مني حاجات كتير، وساعات بنتصادم وبعدين برجع أقول أنه صح، هو عنده عزة نفس ومبيسمحش لحد يكلمه بطريقة مش حلوة.

وواصلت: أسوأ لحظة في حياتي هي وفاة أبويا، والأب مهم جدًا في حياة البنت زي ما الأم مهمة جدًا في حياة الولد، ده اللي ممكن يغير مسار حياتهم.

أما عن انفصالها، فعلقت نهى عابدين: الطلاق صعب، ومش مسألة اتغيرت بعد الطلاق ولكن اللي بيفرق العشرة والعيلة اللي بنتيها، بس في الآخر الجواز والطلاق نصيب، وساعات الطلاق بيكون صحي لمصلحة الطرفين، ومش لازم يكون فيه حد وحش ممكن نكون اتنين اختلفنا ومش متلاقيين في حاجة، نتمنى لبعض الخير ونتعامل مع بعض كويس وخلاص