مِسك دراعي وكان بيقطع فيه.. نص أقوال عامل سيرك طنطا الذي افترسه الأسد

حصل موقع «المصري الآن» على نص أقوال مُساعد أنوسة كوتة المجني عليه محمد إبراهيم البسطويسي، عامل أسود، والمصاب بتهتك بالذراع الأيسر وسحجات بكف اليد اليمني، إثر اعتداء الأسد عليه داخل سيرك طنطا.

وجاء نص التحقيقات كالتالى:

س: ما اسمك وعمرك وطبيعة عملك؟
ج: اسمي محمد إبراهيم عبد الفتاح البسطويسي - ٢٣ سنة - عامل أسود في سيرك فانتزيا كوته

س: ما تفصيلات حدوث إصابتك؟

ج : اللي حصل إني شغال مساعد كابتن خارج قفص الأسود والنمور و بقالي في المهنه دي ست سنین وانهارده كان عندنا عرض من الساعة ٩ إلى الساعة ۱٢ بليل وحوالي الساعه ١١:٤٥ مساءً كنت واقف برا القفص والعرض كان شغال والكابتن محاسن هي اللي كانت جوا في القفص مع النمور وأنا كنت واقف قدام المكان اللي بيجي يعقد عليه النمر الأبيض وكنت بنادي عليه ودخلت أيدي جوا القفص وكنت بخبط على الكرسي اللي بيعقد عليه النمر بحكم شغلي وفجأة لقيته هجم عليا ومسك ذراعي الشمال وكان بيقطع فيه وكابتن محاسن فضلت تضرب فيه والناس اتلمت وفضلت تشدني منه وزمايلي نقلوني على مستشفى طنطا الجامعي وهو ده كل اللي حصل وأنا مش بتهم حد بأي اتهام و لا أرغب في السير في إجراءات الدعوي الجنائية والوقوف بها عند هذا الحد.

س: متى وأنت حدث ذلك؟
ج: الكلام ده حصل امبارح ٢٠٢٥/٤/١ حوالي الساعة ١١.٤٥ مساءً في سيرك فانتزيا كوته منطقة المعرض أول طنطا.

س: ما سبب ومناسبة تواجدك بالزمان والمكان سالفي الذكر؟
ج: أنا كنت شغال في السيرك.

س: ما هي طبيعة عملك واختصاصك الوظيفي تحديدًا؟
ج: أنا شغال مساعد كابتن نمور وأسود و سايس حيوانات يعني أنا اللي بهتم بالحيوانات من حيث الأكل والشرب والنوم.

س: ومنذ متي وأنت تباشر ذلك الاختصاص الوظيفي؟
ج: بقالي 7 سنين

س: ما هى إصابتك تحديدًا؟
ج: أنا دراعي الشمال كله متقطع وفي خرابيش في كف أيدي اليمين.

س: ما هي المسافة التي كانت بينك وبين القفص حال حدوث تلك الواقعه؟
ج: انا كنت واقف قدام المكان اللي بيقعد عليه النمر الأبيض وكنت مدخل أيدي وبخبط على المكان التي بيقعد عليه

س: وما الذي دعاك إلى فعل ذلك؟
ج: ده شغلي وأنا متعود على كده.

س: من المتسبب في حدوث تلك الاصابه لك؟
ج: مفيش حد أنا اللي كنت شغال وفجأه لقيت النمر هجم عليا وعضني من دراعي

س: من هي الكابتن التي كانت تباشر ذلك العرض؟
ج: كابتن محاسن مدحت

س: هل هناك ثمه عمدية أو إهمال من الكابتن محاسن مدحت بالتسبب في حدوث تلك الواقعه لك؟
ج: لا خالص أنا كل يوم شغال كده وده قضاء ربنا وأنا راضي الحمد لله

س: هل تتهم ثمه شخص بالتسبب في حدوث تلك الواقعه لك عن عمد أو بإهمال؟
ج: لا

س: هل توجد ثمه شبهة جنائية في حدوث تلك الواقعه لك؟
ج: لا

س: هل تتهم ثمه شخص بالتسبب في حدوث تلك الواقعه لك؟
ج: لا

س: هل تتهم الكابتن محاسن مدحت أوالقائمين على إدارة السيرك بثمه اتهام؟
ج: لا أنا مش بتهم حد بأي حاجة.

س: ما هي حالتك الصحية الآن؟
ج: أنا هدخل عمليات دلوقتي عشان يصلحوا ايدي ولسه معرفش حالتي عامله ايه

س : هل لديك أقوال أخري ؟
ج: لا - تمت أقواله وتوقع منه