محمد الباز عن مها الصغير: "مش حرامية"

كشف الإعلامي محمد الباز، عن رأيه في أزمة الإعلامية مها الصغير، في واقعة اتهامها بسرقة لوحات فنية من فنانين عالميين ونسبها لنفسها، وذلك خلال استضافتها في برنامج معكم منى الشاذلي.

مها الصغير مش حرامية

وكتب الباز عبر حسابه الشخصي بموقع فيسبوك: “مها الصغير مش حرامية، مسرقتش اللوحات الأربعة وادعت أنها هي اللي رسمتها، مها الصغير في الغالب بتعاني من اضطراب نفسي حاد، بتعاني ربما بسبب الظروف اللى مرت بيها من حالة اهتزاز فى ثقتها بنفسها، العالم من حواليها انهار تقريبا، وممكن جدًا تكون بتعاني من هلوسات خيّلت لها إنها فعلا رسمت اللوحات دي”.

وأضاف محمد الباز: “اللى بيسرق لوحات بيغير شوية من ملامحها، لكن يجيبها ويقول دي بتاعتي، فده جنون كامل، لأن حالة الانفتاح اللي بيعيشها العالم تخلي أي سرقة تتكشف بسهولة، فمفيش حد هيعرض نفسه لأزمة زى دى وهو فى كامل قواه العقلية، بيتهيألى الموضوع محتاج تحليل نفسى، فلو فيه حد من خبراء الطب النفسى يقول لنا إيه الحالة دى يبقى كتر خيره”.

واختتم الباز حديثه قائلًا: “اللى باقوله ده لا ينفى طبعا إننا قدام عملية سطو وخطأ كبير وسقطة مدوية”.

كانت الفنانة والإعلامية زهرة رامي، أرجعت واقعة مها الصغير أيضًا، لأزمة نفسية، حيث كتبت عبر حسابها بموقع فيسبوك: "أنا مش دكتورة"، بس أعرف إن فى حاجة اسمها الإضطراب الوهمي، واضطراب الوسواس القهري، والاضطراب الذهاني".

وأضافت: "أنا مش دكتورة " فبالتالي غير قادرة ومؤهلة تماما لإنى أشخص، بس من القراءات والمعلومات والتحليلات، في نسبة إن الست تكون ماسرقتش عن قصد أو كذبت عن قصد  وارد تكون بالفعل متوهمة و ده "شعور" جالي وأنا بتفرج عليها وهي بتتكلم عن اللوحة .. وعن متابعتلى بشكل عام للى بيحصل بقاله فتره .. وارد جدا جدا تكون فى مرحلة عدم اتزان ومرضى".

واختتمت: "ده مش مبرر خالص، بالعكس ! أنا إحساسي الشخصى بيقول " يا دى الفضيحة " بعد بوست الدنماركية، و لكن برضو حاسة إن ما بالراحة بقى يا جماعة ! كلنا مرضنا والله و اللى بيته من إزاز و كده.