بلاش دهب.. ياسمين عز تثير الجدل حول كريستال عصفور

عبرت الإعلامية ياسمين عز عن رأيها في حفلات “الخطوبة” قبل الزواج، مشيرة إلى أن هذه الاحتفالية غالبًا ما تتسبب في تحميل العروسين تكاليف كبيرة دون فائدة حقيقية. ووجهت نصيحة للفتيات باختيار بدائل أكثر اقتصادية للشبكة مثل "كريستال عصفور" بدلًا من الذهب.

وقالت ياسمين، خلال حلقة من برنامجها "كلام الناس" على قناة MBC مصر، "الخطوبة المفروض تتلغي ونخليه كتب كتاب على طول، مالهاش أي لازمة الفشخرة والذهب. ليه ما نكتفيش بخاتم كريستال عصفور؟ محدش هيعرف الفرق."

وأوضحت موقفها قائلة: "واللي هيقول لي ما أنتي لابسة ألماظ، أنا جايباه لنفسي. لكن المفروض نجيب حاجة معقولة، واللي يقدر يجيب، يجيب، الأغلبية حالتها المادية متوسطة، وأسعار الذهب غالية، والخطوبة مش جواز، فيه فرق كبير."

وتساءلت: "من إمتى بدأنا نلبس الفساتين البيضاء في الأفراح؟ محدش المفروض يلبس فستان أبيض غير العروسة، إلا لو كنتي بتكرهيها وعايزة تنكدي عليها. دايمًا أخوات العريس بيلبسوا أبيض وبيبقوا لازقين فيه، وده بيزعل العروسة."

واختتمت حديثها برسالة: "واحدة بتقول لمرات أخوها ما تتهزريش معاه قدامي علشان بزعل. ما تزعليش! لو فاضية، روحي اتجوزي، بدل ما تعيشي في فراغ وأحزان، أو على الأقل رتبي هدومك في الدولاب."

وكانا ياسمين عز، قد علقت على الجدل المثار خلال الأيام القليلة الماضية، بسبب تصريحات بعض الفنانات عن المساكنة والصلاة والحجاب.

وطالبت «عز» خلال برنامجها، الفنانين بعدم إبداء رأيهم في الثوابت الدينية، متابعة: «ممكن اللي بتمثل تمثل بس، واللي بتغني تغني بس، واللي بترقص ترقص بس، ممكن متقولوش رأيكم في الدين، وتحفظي بيه لنفسك، قوليه قدام مرايتك».

وأكدت أن المساكنة حرام، وأن الصلاة والحجاب فريضة، متابعة: «رأيك عن الصلاة احتفظي بيه لنفسك، الصلاة مفيهاش رأي، سيبونا نعمل حاجة لله وآخرتنا».

وأضافت: «من هو مخترع المساكنة؟! واحد مش عايز يتجوز واحدة قالها تعالي انت هتبقي مراتي، صدقته وراحت، ده تعريف مؤدب وبسيط، فيه تعريف آخر غير مؤدب أنا مش هقوله».

وتابعت «عز»: «المساكنة قلة أدب، المساكنة يعني اثنين مش متجوزين عايشين في بيت واحد مع بعض، إحنا ليه مكسوفين نقول الكلام بمعناه الحقيقي، ده مش عيب، ده حرام، وإهانة للمرأة، أين دينك؟!».