"إيدي اليمين مرزبة".. أول رد من شاب الساحل على اعتذار محمد رمضان

رد الشاب كريم شلبي، صاحب واقعة الصفع المتبادل مع الفنان محمد رمضان، على اعتذار الأخير له، بسبب الواقعة التي تصدرت مواقع التواصل الاجتماعي.

وقال كريم شلبي في فيديو من داخل سيارته: "إذا كانت أيدي الشمال ناموسة فأيدي اليمين مرزبة، وشكرا لكل واحد وقف معايا ودافع عني، وأنا أما اتكلمت اعترفت بخطئي لأن الاعتراف بالحق فضيلة".

وتابع: "الحمد لله أنا شبعان من حب الناس وعيني مليانة من صغري، فأنا مطلعتش اتكلم في أي قناة أو فيديو علشان أنا مش زي ما بتقولوا طالع أركب ترند".

واختتم: "اعتذارك طبعًا على راسي من فوق، بس فيه ناس بتتولد صغيرة وبتكبر، وفيه ناس بتتولد صغيرة وبتفضل صغيرة، ولما روحت مكتب الأمن وأنت واخد مني التليفون قالولي نعمل محضر قولتلهم لأ العفو عند المقدرة زي ما النبي قال، وفي الآخر لو حد طالع من الحوار ده مرضي فهو أنا، وشكرا لكل واحد وقف في صفي".

ونشر رمضان مقطع فيديو عبر حسابه الرسمي على "انستجرام"، وقام خلاله بالاعتذار من أهل الشاب، وأنه لم يتمالك نفسه موضحًا: "دي لا رجولة ولا بطولة"، كما وجه الشكر والتحية لجمهوره ومتابعيه الذين قاموا بالدفاع عنه على حد قوله.

وعلق رمضان على أزمة الصفعة: "الجمهور العدل، الأصيل، الغالي ألف شكر، وربنا مايحرمنيش منكم على وقفتكم معايا ومساندتكم وقرأت وسمعت قد ايه دافعتوا عني، وقد ايه غلطتوا الولد الصغير، ولكن الفيديو ده برضه عامله عشان أعترف بخطأي وأعتذر لأهل الولد الصغير اللي أنا أيدي اتمدت عليه وأنا عارف أنه عيل صغير".

واستكمل: "وهو لما غلط في الأول قلعتوا الكاب وبصيت في وشه لقيته عيل صغير قلت له اسمك ايه يا حبيبي؟، وسيبته ومشيت ولما رجع غلط تاني لفيت قلت له هات التليفون خباه ومتملكتش نفسي وضربته قلم بسيط، القلم البسيط ده طير له الكاب من على راسه والنضارة اللي كان لابسها، ولو اعتبر النموسة اللي وقفت على خدي قلم فأنا أستاهل من النموسة دي خمسة علشان أنا مديت أيدي على عيل صغير، ودي لا رجولة ولا بطولة ولكن أنا لم أتمالك نفسي ودي الغلطة اللي أنا طالع أعتذر عنها".

وأنهى حديثه وقال: "لما أخدت تليفونه ومسحت الفيديو حد قالي اكسر له التليفون عشان ميعملش كده تاني، قولت له طب هو غلط أبوه وأمه ذنبهم ايه يغرموا تمن تليفون تاني خاصة أني عرفت أنه من قرية تانية وجاي يتفسح في مراسي، قلت لهم روحوه، الأمن قالي هنعمله محضر عشان، قولت لهم يروح بعد أذنكم".