محمد معز من مسرح دمنهور إلى الشاشة.. حكاية موهبة تبحث عن النجومية

في خطوة أولى نحو النجومية، يخطو الفنان الشاب محمد معز طريقه بثبات في عالم الفن، معتمدًا على الموهبة والشغف والتجربة المبكرة، التي بدأت منذ الطفولة، ورغم أنه لم يصل بعد إلى دائرة الشهرة الواسعة، إلا أن مشاركاته المتنوعة في الدراما والسينما والمسرح تؤكد أن أمامه مستقبلًا واعدًا

في هذا الحوار، يكشف لنا عن بداياته، وأبرز أعماله، وطموحاته القادمة.

في البداية.. كيف كانت انطلاقتك في عالم التمثيل؟
بدايتي كانت في مدينة دمنهور من سن 5 سنوات، على مسرح مركز شباب المدينة، ودي كانت أول خطوة ليا في المجال. اتعلمت كتير جدًا على إيد الأستاذ فوزي درويش، وهو مخرج مسرحي كبير في دمنهور، وكان ليه دور مهم جدًا في تكويني الفني.

ما أبرز الأعمال التي شاركت فيها حتى الآن؟
شاركت في مسلسل "الاختيار" بدور إسماعيل، وكان من إخراج بيتر ميمي، وده كان بالنسبة لي البداية الحقيقية والأقرب لقلبي، لأنه حقق نجاحا كبيرا جدًا واتشاف بشكل واسع
كمان شاركت في مسلسل "زينهم"، وكان يوم التصوير من الأيام المميزة جدًا بالنسبة لي، والحمد لله المسلسل نجح.

وقدمت أدوار تانية زي دوري في مسلسل "محارب" بطولة حسن الرداد وإخراج شيرين عادل، وكمان شاركت في برنامج "الدوم" سيزون 2.

وعملت بطولات في أفلام قصيرة زي "ديجور" و"روكي" و"لوكيشن"، بالإضافة لمشاركات بسيطة في أعمال زي "وسط البلد" وفيلم "مين يصدق"، وفي أعمال تانية اتصورت ولسه ما نزلتش.

وطبعًا المسرح له جزء كبير في مشواري، غير فيديوهات السوشيال ميديا.

ما آخر أعمالك؟
آخر عمل ليا كان برنامج "كاستينج جامعات".

من هم المخرجون الذين تأثرت بهم؟
المخرجة كاملة أبو ذكري من أكتر الناس اللي أثرت فيا، ونفسي جدًا أشتغل معاها.

ما رأيك في شكل السينما حاليًا؟
أنا مقتنع إن في حاجة اسمها سينما نظيفة، وكلها عرض وطلب، يعني الممثل عليه يختار، والمشاهد يشاهد اللي يحبه.

هل ترى نفسك فنانًا شاملًا؟
مش أقدر أقول إني فنان شامل، لكن أنا بشتغل على نفسي دايمًا بعرف أغني، وبرقص معاصر وبريك دانس، وكمان بلعب ألعاب سيرك، وبطور نفسي عشان أوصل للمستوى ده.

ما نوع الأدوار التي تتمنى تقديمها؟
نفسي أقدم أدوار شبه شخصيتي عشان الجمهور يعرفني الأول، وبعد كده أبدأ أقدم مفاجآت وتغييرات وأثبت إني أقدر أعمل حاجات كتير، وإن شاء الله أبقى نجم.

ما أكثر موقف إنساني أثر فيك؟
موقف عمري ما هنساه، شاب كان على كرسي متحرك وحد تاني بيدفعه في وسط البلد بالقاهرة، وأنا كنت قاعد على قهوة، وفجأة وقفوا في نص الشارع وسلموا عليا ودعموني، وكان موقف مؤثر جدًا بالنسبة لي.

المسرح أم السينما.. أيهما الأقرب لقلبك؟
المسرح ليه مكانة كبيرة جدًا عندي، لكن الشاشة والسينما أقرب شوية، لأنها بتخلي صوتك يوصل للعالم كله. رغم كده، المسرح مهم جدًا، ومن غيره ماكنتش هبقى ممثل.