نادر حمدي يوجه رسالة لصناع الموسيقى في حالة عدم رد المطربين

بعد الجدل الكبير المثار حاليا، حول عدم رد المطربين على الملحنين بعدما اشتكي الموزع الموسيقي نادر نور من قله العمل وعدم رد المطربين على رسائله.

وجه الموزع الموسيقي نادر حمدي،  رسالة لحل لأزمة الإنتاج الموسيقى وغياب شركات الإنتاج التقليدية، بعد شكوى نادر نور.

وكتب نادر حمدي، عبر حسابه الشخصي بموقع التواصل الاجتماعي فيسبوك " «اصدقائى صناع الموسيقى الموضوع بقى سهل أوى دلوقتى لو المغنى اللى بتبعتله ماردش عليك أو مش عاجبه الأغنية وانت مقتنع بيها هات حد صوته حلو تعرفه واعمله الاغنيه ونزلوها ماحدش عارف ممكن تبقوا انقذتوا الصناعة وزودا عدد المطربين الكويسين وهتتنسب ليك فى النهاية».

كان نادر نور، أثار جدلاً واسعاً خلال الفترة الماضية، عبر السوشيال ميديا متحدثًا عن ابتعاده عن الساحة الغنائية والصعوبات التى واجهته فى محاولات العودة إلى الوسط الفنى خلال السنوات الماضية.

وكتب نادر عبر حسابه الرسمى على «فيس بوك»: «باعتذر لكل الناس اللى بتبعتلى كلمات أغانى من فضلكم متبعتوش تانى.. معنديش مشاريع شغال عليها ولا نجوم بتسمع منى أغانى ولا عندى حاجة أقدر أساعدك بيها لأنى ببساطة محتاج اللى يساعدنى».

وأضاف نادر نور: «وللناس اللى بتتهمنى بالكسل والتقصير أنا فعلًا بعدت فترة لأسباب شخصية وباحاول أرجع من 3 سنين ومش عارف.. مسيبتش باب مخبطتش عليه.. فقدت التواصل مع الأغلبية العظمى داخل الوسط الغنائى منهم نجوم اشتغلت ونجحت معاهم ومنهم اللى بحاول أشتغل معاه للمرة الأولى ومنهم اللى عِشرة عمر ومشوارنا بدأناه مع بعض وأحلام حلمناها ونجاحات حققناها سوا واللى بيرد على التليفون مرة مبيردش تانى، وبقيت أحس بالرفض وعدم التقبل، وأنا مش متعود أزن على حد أو أطلب الحاجة أكتر من مرة بشكل يقلل منى ومن احترامى لنفسى بعد كل اللى قدمته حتى لو كان قليل فهو كبير من وجهة نظرى».