الطالب محمود شاكر بجامعة السويدي يصمم نظاما يجمع بين الذكاء الاصطناعي والطاقة الشمسية

قام الطالب محمود وجيه شاكر، بالفرقة الثانية بجامعة السويدي بتصميم نظام يجمع بين الذكاء الاصطناعي والطاقة الشمسية. 

ويقول محمود الذي يدرس Computer Engineering Technology تخصصي Data Science & AI Engineering Technology

أقوم بإعداد مشروع اسمه SolarMind AI، وده مشروع بيجمع بين الذكاء الاصطناعي والطاقة الشمسية. 

وفكرة المشروع ببساطة إنه يساعد في معرفة كمية الكهرباء اللي ممكن محطة الطاقة الشمسية تنتجها في المستقبل بعد فترة معينة، وكمان يتابع حالة المحطة والقراءات اللي جاية منها.

المشروع بيحل مشكلة مهمة، وهي إن إنتاج الطاقة الشمسية مش بيكون ثابت طول الوقت، لأنه بيتأثر بحاجات كتير زي قوة الشمس، السحب، درجة الحرارة، وحالة الأجهزة في المحطة. فبدل ما صاحب المحطة أو المهندس يتابع الأرقام بنفسه من غير صورة واضحة، النظام بيجمع البيانات، يرتبها، يحللها، وبعدها يطلع توقعات تساعد في معرفة الإنتاج المتوقع للمحطة خلال الفترة الجاية.

SolarMind AI يقدر يتعامل مع بيانات جاية من ملفات زي Excel أو CSV، وكمان يقدر يستقبل قراءات مباشرة من حساسات وأجهزة متابعة. المشروع مش بيستخدم البيانات على طول، لكنه الأول بيراجعها وينضفها ويتأكد إنها مناسبة، لأن أي بيانات غلط ممكن تطلع نتيجة غلط.

المفيد في المشروع إنه بيساعد الناس اللي شغالة في مجال الطاقة الشمسية يعرفوا الإنتاج المتوقع في المستقبل، ويتابعوا أداء المحطة، ويعرفوا هل فيه قراءات غريبة أو مشكلة محتاجة متابعة. وكمان بيساعد في التخطيط للطاقة بشكل أفضل، لأنك بدل ما تتعامل مع الأرقام بعد ما تحصل بس، تقدر يكون عندك توقع واضح للي ممكن يحصل بعد فترة معينة.

المشروع عبارة عن منصة ويب فيها لوحة متابعة بسيطة بتعرض البيانات والنتائج والتنبيهات. وفيه جزء خاص بالذكاء الاصطناعي للتوقع، وجزء خاص بمتابعة القراءات، وجزء للهاردوير من خلال حساسات وبورد زي ESP32. وبالفعل تم تنفيذ جزء هاردوير بنستقبل منه قراءات مباشرة من الحساسات، وده بيخلي النظام متجرب على بيانات من الواقع مش مجرد بيانات نظرية.

الهدف من SolarMind AI إنه يقدم حل مصري بسيط وعملي يساعد في تطوير استخدام الطاقة الشمسية، ويدعم فكرة الاعتماد على الطاقة النظيفة بطريقة أذكى وأسهل. والهدف الأساسي من المشروع هو معرفة إنتاج الطاقة الشمسية المتوقع في المستقبل بعد فترة معينة، مع متابعة الإنتاج، اكتشاف المشاكل بدري، واتخاذ قرارات أفضل.