هاني مصطفى يكتب: سبعيناتي في ورطه الـ AI

عن جيل "الفولتارين" و"حرب الوعي"!

يا مساء الفل والياسمين على كل جيل مواليد أواخر الستينات علي السبعينيات وأوائل الثمانينيات والكل كليلة! 

الجيل اللي واكل علي طبلية أبوه، ولافف البحر الميت والحي في أبو قير لبيانكي والهانوفيل، ومعدي على كل زلازل وبراكين الحياة، وساند ضهره لحد النهاردة بكنكه قهوة علي السبرتاية أو بكوباية شاي بالنعناع ونفسه راضية.

الأيام دي يا حضرات التريند اللي مكسر الدنيا اسمه تمانين.

الناس كلها عمالة تجري علشان الـ AI يطلعهم بلبس الثمانينيات، والبنطلون الجينز، والشعر البانكي، وفلتر الألوان الدافية بتاعة الصور القديمة! 

حاجة جميلة وتضحك.. تكنولوجيا بمليارات الدولارات وذكاء اصطناعي فائق، والناس مستخدمينه عشان يهربوا ويرجعوا نوستولوجيا لزمن التلفزيون الملون أبو لمبة والمروحة التوشيبا والعربية الأرجينتا ! 

وطبعا ما ننساش الناس الحلوة اللي بتنزل بصورها دلوقتي وهما اصلا عاشوا الحقبة دى ويقولك.. الطبيعي يكسب .

بس بيني وبينكم كدة.. هو الـ AI هيعرف يعمل إيه ولا إيه؟ 

هيعرف يرسم ريحة الفل والياسمين اللي كانت بتهل علينا من شجر شارع فؤاد ولا شارع أبوقير؟ 

طيب حيعرف يجيب صوت الحنطور وهو ماشي علي بلوكات البازلت في وسط البلد والحصان بيطلع شرز نار؟

ولا هيعرف يوصف الكورة الشراب ولا البوليتيكس اللي لعبناها والطيرات الورق اللي طيرناها في جنينه رأس التين قدام القصر أو في المنتزة؟ 

حيعرف يرجعلنا سور البحر وشكل البحر وريحه البحر؟ 

ولا الطقوس المقدسة من أبلة فضيلة والأستاذ فؤاد المهندس والعسل إيناس جوهر الصبح، لحديث الروح قبل نشرة تسعة لحد نادي السينما، والعالم يغني، وعالم البحار، وحكاوي القهاوي، واخترنا لك، وبقلظ وماما عفاف الهلاوى ولا مواقف وطرائف وعالم الحيوان؟ 

وهل هيعرف يقلد السلام الجمهوري بعصاية المايسترو محمد عبد الوهاب؟ 

طيب حيعرف يجيب التلفزيون وهو بيعمل وششش؟

الفرق بيننا وبين التريند، 

إننا عشنا الروح واللمة والعيلة والصحاب والزيارات الحقيقية المعتادة باليوم والساعة، 

مش رسالة واتس سخيفة .  

واليومين دول، أي نعم بيتقال لسيادتك في الشارع "يا حاج" ولا "يا حاجة"، وبتسمع جدو من الأشباح وإحنا بنفتكره طبعا تنمر لأننا من جوانا مقتنعين إننا لسه شباب بجد والعيال دى قليله الرباية . 

تنزل أجدعها فرح، تنسي إنك إنت وتتنطط وتفرح وتجامل وتجيب آخرك وسط الناس.. وبعدها ترجع البيت بضهر محتاج صيانة وركب محتاجه وش سلندر. تضرب حقنة "فولتارين" ومعاها برشامة "مالتي ريلاكس" عشان العضلات تهدأ! 

بس سيبك أنت.. برضه شباب، لأن الشباب شباب القلب والروح!

بس إسمع يا متيبس يا صديقي الشقيان ويا صديقتي مدمنه البنادول .

الدرس الأهم لجيلنا النهاردة: إوعى تركن!

إوعى تتكبر على العلم والفهم وتقول “خلاص راحت علينا وبارك الله فيما رزق ”اللي بيركن بيبقى شبه شركة "نوكيا" اللي التطور دهسها في لحظة.

جاهد وحارب يا صديقي، اتعلم كل يوم جديد، خد دورات أونلاين وأوفلاين في مجالك، لأنك غصب عنك بقيت القدوة لناس كتير، وأولهم بيتك وعيالك اللي باصين لك ومستنيين منك الأثر والنفس والسند .

لازم تكون لك بصمه وعمل صالح ينتفع به .

احنا في وقت حرب الوعي وحرب الخبرة.. 

حرب الذكاء الحقيقي مش الاصطناعي! 

الـ AI مجرد أداة، لكن عقلك وخبرتك الحياتية وتماسكك هما السلاح اللي بيكسب المعركة.

ودايماً خلي في بالك وعلى لسانك:

 * #جبر_الخواطر_علي_الله: ده الباب اللي بيفتح كل المغلقات، واجبر تجبر.

 * #لطفه_يجري_والعبد_لا_يدري: دي ستر ربنا اللي واقفين بيه على رجلينّا بعد كل اللي مرينّا بيه.

 * #إذن_هي_الحرب: معركة وعي وثبات وحفاظ على البيت والبلد والأثر الطيب.

وعلى رأي صوت النوبة عاشق الإسكندرية "بحر أبو جريشه" الله يرحمه : "دنيا مشيناها خطاوى مش عارفين فين رايحين "؛ عشنا التحولات، وشفنا العجب، ولسه الجاي بتاعنا بإذن الله .. ارفع راسك وجدد نيتك وسيبها علي الله، توكل عليه وصمم إنك تسيب بصمة وأثر، وطالما اللطيف موجود والجبر من عنده يبقي ندخل المعركة وقلبنا حديد!

يالا اسيبك بقي تفرد ضهرك من غيرحد ما ياخد باله .…

بقولك .…

خللي بالك من الكوليسترول واعمل كشف جديد للنضارة وكفايه مسكنات.

سلام يا حاج ... سلام يا طنط .