هاني مصطفى يكتب: أول يوم معاش

في قانون الحكاية والقوانين إللي ربنا حطها في الدنيا، الأرقام والأسامي والزيطة الكتيرة بتروح وتتبخر، وما بيفضلش فوق الأرض غير حاجة واحدة بس : 

إللي ينفع الناس .

ربنا سبحانه وتعالى اختصر القصة كلها في جملة واحدة في كتابه الكريم :

{ فَأَمَّا ٱلزَّبَدُ فَیَذۡهَبُ جُفَاۤءࣰۖ وَأَمَّا مَا یَنفَعُ ٱلنَّاسَ فَیَمۡكُثُ فِی ٱلۡأَرۡضِۚ كَذَ ٰ⁠لِكَ یَضۡرِبُ ٱللَّهُ ٱلۡأَمۡثَالَ} [سُورَةُ الرَّعۡدِ: ١٧].

والزبد ده .. هو كل حاجة زائفة بنجري وراها وبنتغر بيها ؛ المنصب ، السطوة ، المظاهر ، وشلة المطبلاطية اللي بيلهوا البني آدم ويحسسوه إنه ملك زمانه . 

كل ده عامل زي الرغوة اللي بتطلع على وش المية، منظره عالي وكبير ، بس في لحظة بيتبخر ولا كأنه كان موجود. 

لكن اللي بيمكث بجد وبيثبت في الأرض.. هو الأثر الطيب ، والخير إللي زرعته في قلوب العباد .

الحياة دي كلها رحلة قصيرة، والإنسان فيها أثر .. 

ماشي بخطوات بتتسجل عليه.

ولأن الشغل جزء من الحياة، فهو أسرع كشاف بيكشف معدن الإنسان . 

في المكاتب والشركات ، الأيام بتجري زي القطر .. شريط سينما بيجري بسرعة .

ناس بتبدأ ، وناس بتمشي، وناس بتسلم ناس . 

وفي النُص ، البني آدم بيمر باختبار حقيقي : يا ترى هيختار يكون "زَبَد" يطير مع أول هبة هوا؟ ولا "نَفْع" يفضل ثابت حتى بعد ما يمشي؟

تأثيرك في شغلك مش بتقارير آخر السنة ولا بالكرسي اللي قاعد عليه.. تأثيرك الحقيقي في إنسانيتك.

فيه ناس لما تمسك منصب تتغر وتتكبر ، تشوف نفسها على اللي حواليها، وتخدم مصالحها بس، وأول ما يمشوا.. الناس تتنفس الصعداء وترمي وراهم قلة . 

وفيه ناس ثانية ، وجودهم كان طمأنينة.. يعلّموا الصغير ، يسندوا الغلبان ، يطبطبوا على المضغوط ، ويحاولوا يجيبوا حق غيرهم على قد ما يقدروا . 

النمط ده حتى لو ساب كرسيه أو مشي.. دعوات الناس بتلاحقه ، وسيرته بتفضل منورة بين زمايله لسنين طويلة .

وبص حواليك كده يا صديقي بحيادية.. من وسط كل الزيطة والزيارات والمجاملات اللي حوالين الكرسي ، يا ترى مين فيهم اللي بيودك عشانك إنت؟ ومين اللي هيفتكرك ويتصل بيك يفضل محاوطك لما الضجة دي كلها تهدى ؟

دا غير إن فيه فرق كبير جداً بين حد يقدر بعد ما يمشي يزور مكانه القديم ويدخل بوش مفتوح وإبتسامة راضية لأنه كان بيتمنى الخير للكل ، وبين حد تاني رجليه بتبقى تقيلة إنه يمر حتى من قدام الباب.. 

لأنه عارف في سرّه إنه مش محبوب ، أو كان أناني ومتكبر ، وبعد زوال المنصب أدرك إنه بقى ضعيف لأن قوته كانت في الكرسي مش في شخصه.

وطبعاً مفيش حد فينا معصوم من الخطأ ، كلنا بنغلط ونقصّر.. بس الفرق الحقيقي إن فيه دلايل وإشارات كثيرة حواليك بتنبهك إنك ماشي في طريق غلط ، وإن السكينة سرقاك ، وأن الأنانية بدأت تاكلك . 

الشاطر هو اللي ينتبه للإشارات دي بدري ، ويرجع ويصلح قبل ما الفأس تقع في الرأس والمنصب يزول .

وكأن عمنا صلاح جاهين كان بيوصف حال الغرقان في وهم الدنيا والمنصب لما قال:

بحر الحياة مليان بغرقى الحياة

صرخت خش الموج في حلقي ملاه

قارب نجاة.. صرخت قالوا مفيش

غير بس هو الحب قارب نجاة

عجبي!!

عشان كده.. المفروض يا صديقي تسعى بكل جهدك إننا نقولك في نهاية مشوارك :

«إحنا مش بنودعك.. إحنا بنقولك شكراً. 

شكراً على كل ساعة سهرتها ، وكل فكرة قدمتها، وكل حد اتعلم على إيدك ووقف على رجليه بسببك. 

عاوزين نقولك : سيبت وراك سيرة تشرف، وإرث كبير من الأمانة هيعيش في المكان ده وبين زمايلك .

وبصوت عيالي نقول : باسم كل اللي إشتغلوا معاك وعرفوك عن قرب.. بنقولك بندعي ربنا يبارك في صحتك وأيامك اللي جاية وتكون مليانة راحة وسعادة مع عيلتك وحبايبك».

في الآخر.. 

الكراسي بتتغير ، والألقاب بتدوب ، والمكاتب بياخدها ناس ثانية.. 

وما بيفضلش للإنسان غير سيرته وأثره .

وإنت يا صديقي... الإنسان..

عاوز يتقالك ويتقال عليك إيه لما الستارة تنزل ؟ وشريط الرحلة يوصل لآخره ؟ 

وكل رحله ولابد ليها نهاية.

من قلبي بقولك ... 

حاسب .. حاسب نفسك …

لسه فيه وقت..

وطول ما ربنا موجود .. الأمل موجود..