فريق من حاسبات حلوان يقدم مشروع تخرج عن تطبيق ذكى لقراءة اللغة الهيروغليفية

قدم فريق من كلية الحاسبات والذكاء الاصطناعي - جامعة حلوان، فكرة مشروع تخرج بدأت من سؤال بسيط: "ليه لما بنقف قدام جدارية فرعونية أو بردية، مبنكونش فاهمين أجدادنا كاتبين إيه؟ وليه السياح بيحتاجوا مرشد دايماً عشان يترجم لهم؟"
وأشار الفريق إلى أنه تم تتفيذ مشروع : "Ancient Egyptian Hieroglyph Reader" ، عبارة عن تطبيق ذكي، كل اللي عليك تعمله إنك تفتح الكاميرا وتصوّر أي نص هيروغليفي (سواء على جدار، لوحة، أو بردية)، والذكاء الاصطناعي بيبدأ يتعرف على الحروف والرموز دي فوراً، ويرتبها، ويترجمها لـ لغة مفهومة تقدر تقرأها وتعرف القصة اللي وراها!
الموضوع مش مجرد "مترجم عادي".. إيه الصعوبة اللي واجهتنا؟
اللغة الهيروغليفية من أصعب لغات العالم في برمجتها، والتحدي كان كبير جداً لعدة أسباب:
ملهاش قواعد ثابتة في الاتجاه: المصري القديم كان ممكن يكتب من اليمين للشمال، أو العكس، أو حتى من فوق لتحت على حسب شكل الجدار! فكان صعب جداً نخلي الكمبيوتر يفهم هو هيبدأ يقرأ منين.
الرموز المتداخلة: الحروف عبارة عن رسومات (طيور، حيوانات، وأشكال هندسية) ومرسومة فوق وتحت بعض، فكان تحدي مرعب إن الـ AI يلقط كل رمز لوحده من وسط جدارية قديمة أو ممسوحة شوية ومتبهدلة من عوامل الزمن.
فهم المعنى: الرمز الواحد ممكن يكون حرف، وممكن يكون كلمة كاملة، وممكن يكون مجرد زينة! قدرنا نخلي البرنامج "يفهم" السياق عشان يدي ترجمة صحيحة ومفهومة.
اسماء الفريق
معاذ خالد يحيي ابراهيم
منه الله محمد مصطفي طه
هبه عادل علي عبد الخالق
معتز ممدوح حسن عبد السلام
جودي محمد اسامه عبيدو
عمر احمد محمد
المشرف د سهي احسان
جامعة العاصمه (حلوان سابقا) كلية حاسبات و الذكاء الاصطناعي