أحمد داود: الهوى سلطان سبب غيابي عن ولاد رزق 3

استضافت الإعلامية فاطمة مصطفى، الفنان أحمد داود في برنامجها الراديو بيضحك المذاع على الراديو 9090 للتحدث عن النجاح الكبير الذي حققه فيلمه الأخير الهوى سلطان.
فقد حقق الفيلم بعد أسبوعين من طرحه بدور العرض المصرية أكثر من 40 مليون جنيه، وقال أحمد داود إن تصويره لفيلم الهوى سلطان هو الذي منعه من التواجد في الجزء الثالث من فيلم ولاد رزق.

وكشف أيضًا عن محاولته للتنسيق والتواجد في الفيلمين لكنه لم يوفق في ذلك، فقال: "بصي في سيناريوهات كلنا بيبقى نفسنا فيها بس السيناريو الرباني ده بيبقى أحسن سيناريو، هو في النهاية مكنش فيه نصيب، يعني أنا كنت أتمنى أكون في "ولاد رزق" بحبه جدًا، وكنت حابب علاقة عاطف ورجب جدًا".
وتابع "في الجزء التاني كان عاطف هو اللي بيحكي، بس لما تيجي تفكري كده في ولاد رزق هتلاقي إن الأخوات هما أساس الحدوتة (عز وعمرو يوسف، وفيشاوي وكريم قاسم) أي شخصيات تانية بتبقى على حسب الحدوتة، يعني ممكن شخصية "صقر ترجع أ/ سيد رجب، ممكن تايسون يروح أو لاء، ممكن أنا أروح أو لاء، فهي حسب الحدوتة، بس الأساس إن هما الأربعه لازم يبقوا موجودين".

واستكمل "فكنت أتمنى طبعًا أكون في ولاد رزق والفيلم اداني نجاح كبير، بس الظروف مسمحتش، وأنا حتى حاولت أصور معاهم وروحت أول يوم بس محصلش نصيب، بس حسيت إن هي متقدره كده، انت مكانك مش هنا دلوقتي، أنت لازم تعمل ده عشان يحصل ونقعد قعدة زي دي نتكلم عن نجاح حاجة تانية، فدايمًا مش بزعل على حاجه مبتظبطش أو مواعيد مش ظابطة أو اختلافات على حاجة معينة".
واختتم أحمد داوود حديثه بتمني التواجد في الجزء الرابع من أولاد رزق فقال "في النهاية الحاجات اللي من نصيبك محدش هيعرف يوقفها، والعكس، لو حاجه عقربت أو مش ظابطة، كنت زمان بتوتر دلوقتي برتاح، لأني بحس ربنا عنده سيناريو أحلى لينا، فخليك مسلمها لربنا بجد وهتلاقي نفسك مرتاحة، وإن شاء الله ولاد رزق 4 عاطف يرجع".