الفنان أحمد داود يكشف حقيقة خلافه مع محمد فراج

كشف الفنان أحمد داود عن حقيقة خلافه مع محمد فراج وتفاصيل حالة المنافسة الدائمة بينهما وذلك أثناء استضافته في برنامج الراديو بيضحك الذي تقدمه الإعلامية فاطمة مصطفى عبر الراديو 9090.
ونفى “داود”، كل هذه الأقاويل، وقال "فراج حبيبي وأخويا، احنا صحاب من زمان، احنا كنا في مركز الإبداع فكان ييجي المخرجين يختاروا كل الناس ونتبقى أنا وفراج دايمًا من زمان، مش عارف فيلم ايه يا أنا يا فراج، مسلسل ايه فراج أو أنا، فكان دايما في منافسة الناس عملاها مش حقيقية، اننا احنا الأتنين بنعمل نفس الأدوار مع إن كل واحد له "طعم مختلف".

وتابع: "الموضوع ده عمل كده.. اننا طول الوقت صحاب بس في "تنشنه" مخلوقة احنا مش عارفين سببها ايه، لحد ما في مهرجان الجونة قعدنا شبه أسبوع بننزل سوا بنفطر سوا بنروح ونيجي مع بعض فاللي هو بنضحك ونسأل بعض هو ليه بيتفرضوا كل ده وهو مش حقيقي".

واستكمل "فراج قلبه أبيض ولما باركلي فرحته كان باين إنها من قلبه وأنا كمان ربنا يعلم نيتي ناحيته بجد هو وبسنت، فهو أخويا وحبيبي وحقيقي بتمناله كل خير، في النهاية النجاح واسع اوي مفيش حد بياخد نجاح حد أو رزق حد".
وختم أحمد داود حديثه بنصيحة للجميع قائلاً: "لازم تتمنى الخير للناس علشان يجييلك، فلو أنا قافل وفاكر إن هحلق على الرزق ونقعد كلنا نتخانـق عليه علشان يجلنا، يا عم روح.. مش هيحصل إذا ربنا مش كاتبلك الحاجة دي، فـهتلاقي كل الدنيا بتتخانق في حتة وربنا رازقك وفاتحلك باب ليك مخصوص في حاجة تفرحك وتبسطك، بس من البداية افرح واتمنى الخير لكل الناس".

ويحتفل أحمد داود حاليًا بنجاح فيلمه الهوى سلطان، والذي حقق بعد أسبوعين من طرحه بدور العرض المصرية أكثر من 45 مليون جنيه.