محمد ممدوح يرد على أحمد حلمي: كلامك عني شهادة كبيرة وتكريم ليا

أعرب الفنان محمد ممدوح عن سعادته، بتصريح أحمد حلمي الذي قاله عنه أثناء لقائه مع الإعلامية سالي شاهين في تغطية حفل ختام الدورة الـ 45 من مهرجان القاهرة السينمائي، والذي عرض على شاشة قناة dmc.
وحرص محمد ممدوح، على الرد من خلال إعادة نشر اللقاء عبر حسابه على إنستجرام، وكتب "دي شهادة كبيرة اوي يا أستاذ يا كبير يا فنان يا محترم، كون أن حد زي أحمد حلمي اللي أنا كنت دايمًا بتعلم منه يقول عني كده ده تكريم ليا في حد ذاته".
وكان أحمد حلمي قد قال "في ناس كتير تستحق تتكرم السنة الجاية، وخايف أقول أسامي حد يزعل، بس أحب إننا نكرم الجداد، مش لازم يكون عمل أفلام كتير، ممكن يكون عمل فيلم واحد وياخد جايزة، لأن الفيلم حلو، يعني أنا مثلاً أحب أكرم محمد ممدوح تايسون لأنه موهبة كبيرة أوي".

كما كشف حلمي، عن سبب غيابه عن حفل الافتتاح وعدم مشاهدته لأي من الأفلام المشاركة في المهرجان خلال الفعاليات، فقال "ملحقتش أشوف أي أفلام في المهرجان، أنا حتى محضرتش حفل الافتتاح لإني كنت مسافر، لكن الحمد لله لحقت الختام".
وتابع "مهرجان القاهرة السينمائي مهرجان عريق، وهو حدث مهم من أيام ما كنا في الجامعة، وكان بيطلع لنا كارنيهات علشان نحضر، وحضور مهرجان السينما كان حاجة كبيرة أوي بالنسبة لنا، لأننا كنا بنعدي على كل السينمات في وسط البلد وبنتابع الأفلام بشكل كبير".

ووجه حلمي رسالة للفنان حسين فهمي رئيس المهرجان قائلاً: "شكرا على إنك رئيس مهرجان القاهرة السينمائي، وعلى المجهود والعطاء والتنظيم، كنا في يوم من الأيام لما حد يسرح شعره على جنب ولا يحط برفيوم نقوله أنت فاكر نفسك حسين فهمي ولا إيه".