رامي صبري: محمد سامي عرض عليا بطولة مسلسل وقولتله هتندم

كشف الفنان رامي صبري خلال لقائه مع الإعلامية أسما إبراهيم، في برنامج “حبر سري” المذاع على قناة القاهرة والناس، أن المخرج محمد سامي عرض عليه دور البطولة أمام مي عمر في مسلسل "إش إش"، المقرر عرضه في موسم دراما رمضان 2025.
وأكد رامي أنه لا يرى نفسه كممثل في الفترة الحالية، فقال محمد سامي كلمني من فترة على مسلسل "إش إش" إني أطلع أمثل مع مي عمر، هي فنانة جميلة بحبها وبحترم فنها ومسيرتها".
واستكمل: “كنت مبسوط بالفكرة لكن أنا عندي مشكلة في موضوع التمثيل، بس قعدت مع محمد سامي وقولت له هتندم إنك جبتني، حاولت اقرأ السيناريو وأحفظ وأجرب لكن أنا مش مقتنع دلوقتي ممكن بعد سنتين أو 3، الدور كان البطل مع مي عمر اللي بيحبها”.
وتابع: "محمد سامي صديق من زمان ومخرج عبقري وناجح جدًا جدًا في الدراما، وهو مختلف عن أي حد في جيله ومجتهد جدًا، وأنا بحبه، محمد سامي في ممثلين كويسين خلاهم أحسن هو مخرج شاطر".

وفي سياق آخر، هاجم الفنان الشاب ويجز الفنان رامي صبري من خلال فيديو نشره في “ستوري” عبر حسابه على موقع التواصل الاجتماعي إنستجرام مساء أمس، وذلك على خلفية تصريحات رامي عن ويجز ومطربي الراب في اللقاءات التلفزيونية التي ظهر فيها. 

فقال: "أنا شايف إن أنت متفهمش في الراب ده حاجة ولا بتفهم الكلام بتاعه، زي ما أنت قولت قبل كده، فمش هتعرف تعمله، فأنا راجل مثلا لو لقيت حد بيعرف يسوق عجلة وأنا مبعرفش بحترمه.. ليه؟ علشان هو عمل أكيد حاجة غير اللي أنا عملتها، اشتغل على نفسه في حاجة انا مشتغلتش على نفسي فيها".

واستكمل: "أنت مبتقدرش الفنانين دول، أنت شايفهم كده بيحاولوا يوصلوا لدرجة أنت فيها، في حين إنهم بالفعل معديينك، أنت مش رقم 2 يا رامي، أنت رقم 19 مثلاً أنت بعيد اوي بجد".