درس لكل زوجين.. مي كساب عن رثاء نشوى مصطفى لزوجها

عبرت الفنانة مي كساب، عن مشاعر الحزن والتعاطف العميق مع الفنانة نشوى مصطفى، وذلك بعد وفاة زوجها رجل الأعمال محمد عماد، الذي وافته المنية قبل ثلاثة أيام. ووجهت مي كساب رسالة دعم مؤثرة لنشوى مصطفى، عبرت فيها عن تقديرها الكبير لمشاعر الوفاء والإخلاص، التي أبدتها نشوى في رثائها لزوجها.

كتبت كساب: “نشوى مصطفى بحبك من كل قلبي، مثال للست المصرية الأصيلة المشرفه اللي عارفة دينها وعارفة حدودها وواجباتها، فنانة عظيمة، وأم وزوجة أعظم، قد ايه كلامك عن جوزك لمس قلبي وأثر فيا، قالت عنه (سترتني وأكرمتني وجبرت خاطري وعلمتني وربيت عيالنا أحسن تربية، ٣٣ سنة مبعدناش عن بعض لحظة) كلامها درس كبير لكل زوج وزوجة، ربنا يراضيها بقضاءه ويبرد قلبها ويصبرها على فراقه، هي وأولادها، ادعو للزوج الكريم محمد عماد زوج نشوى مصطفى بالرحمة والمغفرة، وادعو لنشوى وولادها”.

رثاء نشوى مصطفى لزوجها

وكانت نشوى مصطفى قد نشرت رسالة حزينة عبر حسابها على "فيس بوك"، نعت فيها زوجها الراحل بكلمات تحمل الكثير من الألم والوفاء، حيث كتبت: "سترتني ربنا يسترك، أكرمتني ربنا يكرمك، سيبت لي أجمل هدية ولادنا ربنا يهاديك بالفردوس الأعلى، 33 سنة ستر وكرم ومحبة ومودة ورحمة، علمتنى ازاي أكون من المتصدقين، علمتني ازاي أكون دايمًا في معية الله، علمتني ازاي تكون عزة النفس، علمتني ازاي اتسامح حتى مع اللي اذاني، علمتنى ازاي اتوكل على الله في كل شئوني، علمتنى ازاي أكرم ضيفي، علمتني معنى التواضع مع عباد الله الضعفاء”.

وتابعت “يا نبيل الأخلاق يا ابن الأصل العالي، نسيت تعلمني ازاي أقدر أعيش من غير وجودك، 33 سنة مبعدناش عن بعض لحظة، 33 سنة ذكريات وحياة بحلوها ومرها، 33 سنة كنت خير زوج وخير أب، 33 سنة أكرمتني وسترتني وجبرت خاطري وربيت عيالنا أحسن تربية”.

واستكملت “ليه يا عماد سيبتني لوحدى كده، مستاهلش منك تسيبنى لوحدي، ده أنا مبعرفش أعمل حاجة في الدنيا، انت اللي كنت بتعمل لنا كل حاجة، انت اللي سندتني في كل ظروف حياتي الصعبة، في شدتي وفي مرضي شيلتني وطبطبت عليا، ياااااه على غلاوتك ياعشرة عمري، يااااااه على غلاوتك يا أبويا وأخويا وحبيبي وجوزي وابني، بموت ياعماد بموت وانت مش قدام عيني، هكمل ازاي يارب من غيره”.