" التعبير " مبقاش يضاف للمجموع

منذ زمن انتهى، حرص أشرف أساتذة اللغة العربية، على تعليمنا بجد، معتبرينها رسالة عمر، أسهبوا في توضيح قواعد اللغة، نحو، وصرف، ضمائر، وأبيات شعر، والأهم التعبير.

قالوا لي اقرأ كتير واكتب وعبر، كانوا رحم الله من توفى منهم، وأعان الله من بقوا لوقتنا الحالي، حريصين على تعليمنا مخزون من المرادفات والعبارات والجماليات تفتح عقولنا عشان نبدع في التعبير، لأن التعبير عليه 8 درجات في امتحان العربي، فكانت حصص كامله على مدار العام تُخصص للحضارة، ومصر هبة النيل، والأم، وزعماء الحراك الوطني، عشان نقدر نتخيل ونقراء أكتر، ونزود مخزونا من الكلمات، وبالتالي نزود الكتابة، عشان في الامتحان منسبش سطر فاضي، لأنه كل ما عبرت في سطور أكتر كل ما جبت مجموع أكبر وبقيت شاطر.

لذلك في صبحي ومسائي كنت اقرأ وألاحظ وأشعر، عشان أقدر أعبر.

يمكن كان منهم اللي هدفه أنك تعبر لمجرد المجموع، ومنهم اللي كان عاوزك تعبر بجد، بس دا زمن وفات، ولكل وقت تعبيره.

دلوقت تقريبا التعبير خرجوه من المجموع ومبقاش ليه أي فايدة في إنك تبقى شاطر، يمكن لو بطلته تضمن تبقى عايش، لأنه مبقاش حد يسمع، إنما في حد بيلسع.

لذا ومع مقتضيات العصر والأوان، ولأننا في صدد حركة تطور للتعليم يجب أن نغرس في أجيالنا الجديدة حب التعريف، والاهتمام بالدروس المستفادة من قانون الغاب، وتاريخ البطولات أياها، وعلوم الاستاتيكا والحركة الساكنة، وأصول إعادة التدوير في الأشخاص وعن لقمة العيش.

كما لدي اقتراح لطيف.. اطالب بمعاقبة على كل من يواصل الاعتقاد بأن التعبير ما زال له دور في مجموع أفضل، لأن التعبير دلوقت يضاف في سوابقك وهتروح تقعد في الاحتياطي، اللي هيزود عدد شهور وسنين قضبانك مش هيزود المجموع.

التعبير مبقاش بيخليك تتخيل، بس ممكن يخليك تتخيط. 

التعبير لا يساعد على فتح الخيال، التعبير يؤدي إلى فتح الدماغ.

التعبير بيودي النار مش بيضاف للمجموع.

يجب حذف التعبير لضمان مستقبل أفضل.