أزمة زيزو تتفاقم في الزمالك.. تجميد محتمل بعد استبعاده من مباراة ستيلينبوش

قرر مجلس إدارة نادي الزمالك، بالتعاون مع الجهاز الفني للفريق الأول، استبعاد أحمد مصطفى زيزو من مباراة ستيلينبوش الجنوب إفريقي في بطولة الكونفدرالية، وذلك على خلفية تصريحاته الأخيرة.

وكشف مصدر داخل النادي لـ«المصري الآن» أن الإدارة اتخذت هذا القرار كعقوبة لـ زيزو بسبب تصريحاته المتعلقة بأزمة تجديد عقده.

وأضاف المصدر أنه تم إبلاغ زيزو بالقرار، مما جعله يتدرب بشكل منفرد خلال مران اليوم الثلاثاء، بالإضافة إلى أنه سيتم تحويله للتحقيق بعد انتهاء مباراة ستيلينبوش.

وأشار المصدر إلى أن زيزو  قد يتم تجميده ومنعه من المشاركة في المباريات حتى نهاية الموسم.

اقرأ أيضاً.. زيزو يفتح النار: تعرضت للإهانة رغم إخلاصي للزمالك

وكان أصدر اللاعب أحمد مصطفى زيزو، بيانا رسميا لتوضيح تفاصيل أزمة تجديد تعاقده مع الزمالك وحقيقة انتقاله إلى الأهلي.

وكتب زيزو عبر ستوري على حسابه الشخصي على انستجرام "  الحمد لله أنا راجل بحترم كل الناس.. لكن للأسف عدم ردي علي المعلومات المغلوطة. والتزامي الصمت زاد عن حده ".

وتابع :"كل ساعة خبر عن توقيع أو تجديد عقد زيزو وكل واحد بيغازل الشريحة اللي عايزها من الجمهور"

وأكمل:"بكل وضوح أنا لم أوقع لأي نادي سواء داخل أو خارج مصر "

وأوضح : “اللي حصل على توقيعي يتفضل يعلن .. إذا كان كلامه صحيح ؟ ”

وأكد :" كمان اللي عنده دليل على توقيعي لأي نادي برضو يتفضل يطلعه على الملأ..  الناس لازم تعرف كويس انا بقدر جدا الكيان الكبير اللي أنا بلعب فيه.. ولا يمكن أنكر فضله عليا"

وأردف :"لكن فيه حاجة أنا مكنتش حابب أتكلم فيها خالص .. لأنه للأسف الأمور في الإعلام كلها في إتجاه واحد".

وبشأن أزمته مع الزمالك قال زيزو :"ليه محدش اتكلم عن حقوقي المشروعة زي أي لاعب في الدنيا.. ليه محدش اتكلم إن الناس سابتني بقالها شهور طويلة ومش عايزين يجددوا عقدي"

واستطرد :"ليه محدش اتكلم عن المستحقات المتأخرة اللي ليا بقالها كتير ومش لاقي حد يجاوبني"

وأكمل: "ليه محدش اتكلم انه التجديد المرة دي جاي في مرحلة متقدمة من عمري بالنسبة للعيبة الكورة .. ولعيب الكورة مهما طول. عمره قصير في الملعب.".

وبشأن العروض قال :" محدش كمان اتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده قلت وهفضل أقول أنا منتظر كلمة النادي. ورد الإعتبارات كتير مش لتجميل الصورة. والجماهير لازم تكون عارفة الحقيقة" .

وعن تجديد عقده قال :"زيزو مش بيزايد.. ولا بيتاجر .. لكن لازم الطرف الثاني يكون عايزني أكمل.. وتكون فيه استجابة لحاجه من المعروض عليا على الأقل.. لكن للأسف الكلام معايا حاجة .. واللي بيتقال للإعلام حاجة تانية"

وعن تسريب تفاصيل المفاوضات قال :" أنا مينفعش اجرح في حد. ولا أتكلم في حق حد.. لأن اللي بيتقال في الجلسات عيب يتقال برة .. على الأقل من ناحيتي .. أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي وأي كلام هيتقال غير كدة في موضوع التجديد أو التوقيع قبل الموعد ده  هيكون كلام غير صحيح"

وعن موقفه من التجديد اختتم حديثه قائلا :" ورسالتي الودية جدا للمسئولين في النادي اللي أنا بحترمهم جميعا .. أتمنى الحوار في مسألة تجديد العقد يكون بيني وبينكم... مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق شكرا على تفهمكم موقفي"

اقرأ أيضاً.. برفقة إداريي الأهلي.. زيزو يستخرج تأشيرة سفره إلى أمريكا للمشاركة في كأس العالم للأندية

أرقام زيزو بقميص نادي الزمالك 

ويعد أحمد مصطفى زيزو، أحد أعمدة الزمالك على مدار الخمس سنوات الماضية، حيث خاض منذ انضمامه إلى الزمالك في عام 2019، 249 مباراة، ونجح في تسجيل 83 هدفًا وصناعة 65 هدفًا آخر.

أما على مستوى الموسم الحالي خاض 16 مباراة في الدوري المصري، و8 مباريات في كأس الكونفدرالية الأفريقية، و2 في كأس السوبر المحلي، و3 في كأس مصر، ومباراة واحدة في السوبر الأفريقي.

وتمكن زيزو من إحراز 7 أهداف، منها 3 في الدوري المحلي، و3 في بطولة الكونفدرالية، وهدف واحد في كأس مصر، كما صنع 8 أهداف لزملائه.