سنتدخل بقوة.. اتحاد الكرة يكشف موقفه من أزمة عبد الرحمن جبنة

اصدر اتحاد الكرة المصري، برئاسة جمال علام، بيانا للكشف عن موقفه من أزمة اللاعب عبد الرحمن خالد الشهير بـ «جنبة» وذلك بعد فسخ تعاقده مع نادي العربي الكويتي.

وجاء بيان اتحاد الكرة كالأتي:

بخصوص ما تم تداوله بشأن التصريحات التي أطلقها عبد الرحمن خالد الشهير بعبد الرحمن جبنة لاعب المقاولون العرب السابق، يؤكد مجلس إدارة الاتحاد المصري لكرة القدم أنه تابع باهتمام ما قاله اللاعب وبعد مراجعة كافة الأوراق لاستيضاح الأمر، تبين أن اللاعب عبد الرحمن خالد كان مقيدا في سجلات الاتحاد كلاعب في صفوف المقاولون العرب وتم الاستغناء عنه، كما تم ارسال بطاقته الدولية لنادي العربي الكويتي يوم 11 أغسطس الجاري وهو الإجراء الرسمي لانتقال أي لاعب من اتحاد الي اتحاد آخر، ولم يصدر عن الاتحاد المصري لكرة القدم أي بيانات أو إفادات عكس ذلك .

ويهيب الاتحاد المصري لكرة القدم بجميع اللاعبين المصريين الالتزام بالطرق القانونية والشرعية عند التعاقد مع وكلاء لاعبين معتمدين بالاتحاد الدولي أو المصري حفاظا علي مستقبلهم وعدم الانسياق وراء إغراءات الوكلاء ، كما يهيب الاتحاد بالوكلاء الحفاظ علي مصالح اللاعبين .. كما أن الاتحاد المصري سيتدخل بقوة في حالة تلقيه أي شكاوي من اللاعبين ضد الوكلاء بداعي التلاعب أو التحايل للقضاء علي مثل هذه الظواهر .

أزمة عبد الرحمن جبنة 

أعلن نادي العربي الكويتي، فسخ التعاقد مع لاعب نادي المقاولون العرب السابق، عبد الرحمن خالد 'جبنة' بعد 11 يوما فقط من إعلان التعاقد معه.

وقال جبنة في فيديو نشره عبر حسابه الشخصي: 'حقيقي مش مستعوب اللي حصل معايا.. مش قادر أفكر ومش عارف مستقبلي رايح فين ولا جاي منين، حاسس إني بحلم، عُمر في بني أدم يعمل كدا في حد'.

وأضاف: 'نادي العربي قال إني مضيت لنادي تاني (درجة رابعة) بدون علمهم ودا محصلش، انا بلعب في الدوري المصري من 9 سنين وبيجلي عروض من أندية كتيره عمري ما أعمل كدا'.

وأكمل: 'الحكاية أن في مدرب كبير في مصر، قالي أن في وكيل كويس خليك معاه هيعملك كل اللي انت عايزه، المهم أن الوكيل دا مضيت معاه، وقال انا هجبلك عروض ولو النادي مبيدفعلكش فلوسك هديلك فلوسك، وكبرت المدرب اللي نصحني وروحت مضيت معاه فعلا.. في فترة كنت باخد منه مبلغ كل شهر.. لأن نادي المقاولون مكنش بيطلع فلوس بسبب النتائج، وانا عندي أسرة وعندي التزامات، وكنت متفق معاه إن لما يجيلي عروض هدفعله الفلوس اللي خدتها وكمان جدعنه هديله جزء من فلوس أي نادي هروحه'.

وواصل:'ولما لقيته مش شغال ومفيش عروض جبهالي.. روحت نادي العربي، وبعد ما روحت.. لقيت الشخص دا بيهدد وكيلي أنه هيبطلني كورة، ومش هيخليني ألعب كورة تاني.. ومصمم يأذني وعاوز فلوس أكتر من انضمامي للعربي، وقولت له أنا مخدتش فلوس لسا من النادي ولما أخد فلوس هديلك فلوسك'.

وأتم: ‘أخد عقود مضيتها معاه من سنه وراح حطها في نادي في الدرجة الرابعة، وراح اشتكاني لنادي العربي على اساس اني ماضين في ناديين.. في ورقة في اتحاد الكرة راحت لـ النادي العربي أني مقيد في نادي الدرجة الرابعة، وانا مش مقيد معاهم أصلا!!، دي كارثة ان في حد واخد فلوس من الاتحاد علشان يبعت ورقه للنادي العربي، ورقة مزورة!! ازاي حد يعمل كدا علشان ألف ولا ألفين جنيه، حسبي الله ونعم الوكيل في أي حد’