رضا إدريس لـ"المصري الآن": أقدم مفاجآت غير متوقعة في رمضان بـ"إفراج" و"هي كيميا" | خاص

   قال الفنان رضا إدريس في تصريحات خاصة لـ "المصري الآن" إنه يعيش حالة من السعادة والحماس بسبب مشاركته في أكثر من عمل درامي خلال موسم رمضان 2026، مؤكدًا أن هذا الموسم يعد من أهم المواسم في مسيرته الفنية خلال السنوات الأخيرة.

وأضاف رضا إدريس لـ "المصري الآن" : "مبسوط جدًا بمشاركتي في رمضان 2026، خصوصًا إن الأعمال اللي بشارك فيها مختلفة تمامًا عن بعض، وده كان تحدي حقيقي بالنسبة لي كممثل".

وعن مشاركته في مسلسل "إفراج"، أوضح: "إفراج عمل درامي تقيل، فيه وجع حقيقي وقصص قريبة من الناس، والشخصية اللي بقدمها من الشخصيات اللي بحبها لأنها صادقة ومش سهلة، وبتعكس جزء من الواقع اللي بنشوفه حوالينا كل يوم" .

وأشار إلى أن العمل مع فريق مسلسل "إفراج" كان عاملًا أساسيًا في حماسه للمشاركة، قائلًا : "اللي شجعني أكتر هو الكواليس، اشتغلت مع مجموعة فنانين كبار ومخرج فاهم هو عايز إيه، وكل واحد فينا كان حريص يطلع أحسن ما عنده».

وعن تجربته المختلفة في مسلسل "هي كيميا" ، قال رضا إدريس لـ "المصري الآن": "هي كيميا عمل خفيف ولطيف، بس في نفس الوقت مش سطحي، الكوميديا فيه طالعة من المواقف والعلاقات، وده النوع اللي بحبه، لأني شايف إن الضحك الحقيقي لازم يكون نابع من الواقع".

وأكد رضا إدريس أن التنوع بين العملين كان مقصودًا، موضحًا: "كنت حريص أكون موجود في لونين مختلفين، عشان الجمهور يشوفني بشكل مختلف، ومتحمس جدًا لرد فعل الناس، خصوصًا إن الشخصيات بعيدة عن أي نمط متكرر".

واختتم تصريحاته لـ«المصري الآن» قائلًا: "رمضان دا بالنسبالي محطة مهمة، وإن شاء الله الجمهور يحس بالمجهود اللي اتبذل، لأن كل فريق العمل اشتغل بحب واحترام شديد للفن وللمشاهد".