المخرج محمد دياب: فيلم أسد لا يدعم الأفروسنتريك

أكد المخرج محمد دياب، أن ما تم تداوله مؤخراً عبر السوشيال ميديا، بأن فيلم "أسد" يدعم أفكار الأفروسنترك عار عن الصحة تماما.

وكتب دياب من خلال حسابه على موقع فيس بوك: "أسد بيدعم افكار الافروسنترك؟.. أفروسنتريك معناها ادعاء أن المصريين اللي في مصر حاليا غزاة والحضارة المصرية اصلها افريقي بناها الافارقة، و ده كلام فارغ طبعاً".

وأضاف أن"أي شخص اتفرج علي فيلم أسد شاف ان اول مشهد في الفيلم العبيد اللي في الفيلم بيتخطفوا من افريقيا علي يد قراصنة انجليز وبعدها بيتباعوا في مصر. يعني العبيد اللي في الفيلم مش من أصل مصري و ده بينسف الاتهام الباطل ده في اول مشهد في الفيلم! ده بالعكس ضده".

وتابع : "شخصياً عندي فيلم فرعوني شغال عليه وأعلنت عنه قبل كده، بيكشف وهم فكرة الأفروسنتريك تماماً، ودي قضية مهمة فعلاً، بس بستأذن كل الوطنيين اللي خايفين علي مصر من أي مؤامرات ممكن نتأكد قبل ما تتهموا ناس في صفكوا؟".

وأكد أن صناع الفيلم مصريين ووطنيين يحبوا بلدهم قائلاً: "صناع فيلم أسد مصريين ناس وطنيين عملوا الفيلم بتفاني واشتغلوا عليه 3 سنين وصوروه بالكامل في مصر بإيادي مصرية وقدموا منتج بشهادة الجميع يساوي الأعمال العالمية في الجودة، محتاجين دعمكوا عشان السينما المصرية صناعة وطنية ناجحة، تأثيرها مش مادي فقط بل هي قوة ناعمة مهمة لنشر الثقافة والوعي المصري".

واختتم حديثه قائلاً: "الكلام اللي كانت بتتناقله الصحافة من أن الفيلم عن ثورة الزنج في العصر العباسي عاري من الصحة، وعمره ما خرج من حد من صناع الفيلم،  أسد بيتكلم عن منتصف القرن التاسع عشر لما مصر كانت أول دولة في المنطقة تلغي العبوديه وازاي القرار ده في وقتها عمل زلزال اجتماعي، بدعوكوا كلكوا تتفرجوا علي الفيلم وطبعا النقد مرحب بيه، بس بستأذنكوا يكون نقد لحاجات موجوده في الفيلم".