عمرو محمود ياسين يكشف معاناة زوجته مع مرض السرطان

كشف السيناريست عمرو محمود ياسين، تفاصيل الأزمة الصحية التى مرت بها زوجته الإعلامية آيات أباظة، بعد اكتشافه إصابتها بمرض السرطان.

وقال عمرو محمود ياسين، فى لقائه مع الإعلامى أحمد سالم ببرنامج «كلمة أخيرة» عبر قناة ON: «خضنا تجربة علاج السنة اللى فاتت بأدوية وجراحة وخلصنا واحتفلنا ببشائر الشفاء ودخلت أشتغل وننسى اللي كان، وبعد ما المسلسل خلص، بنعمل فحص اتضح فيه مشاكل وبدأنا رحلة علاج جديدة، يمكن الكلام ده سهل، لكن التفاصيل صعبة جدًا».

وأضاف عمرو محمود ياسين متأثرًا: «وإنت رايح تعمل الفحص مش عاوزين نسمع إلا كلمة واحدة كله تمام، لكن الدكتور بيقولك لسه النتيجة، وبفضل قاعد كل الوقت ده في حالة رعب حقيقي».

وتابع: «اللحظة اللي بيجيب فيها نتيجة الفحص بشوفه وألاقى فيه مشكلة وهى تسألنى إيه الأخبار بعيش تفاصيل صعبة، هى مش متخيلة إن فيه حاجة، وعلشان أقول وأشرح صعبة جدًا، التفاصيل مرهقة.. الناس بتسأل إيه الأخبار وإحنا بنعرفهم، لكن الليالى دى بتعدي ازاى من ألم وتعب وإرهاق».

وأختتم: «عرفت آيات من أولى ثانوى وقرأنا الفاتحة بعد ثانوية عامة، وتالتة جامعة اتخطبنا ورابعة اتجوزنا، من هنا تيجي صعوبة التجربة، لأنها عاشت معايا أكتر ما عاشت مع أهلها»

وكشفت مؤخراً الإعلامية آيات أباظة، بأنها مازالت في مرحلة العلاج من مرض السرطان، الذي أصيبت به مؤخراً، وجعلها تبتعد عن العمل في مجال الإعلامي.

وكتبت أيات أباظة عبر حسابها على فيس بوك: ناس كتير بتبعتلي تطمن عليا ومكنتش برد، أنا آسفة أنا لسه بكمل العلاج، وأنا راضية ومتأكدة إن ربنا لما بيبتلي حد بيبقى بيحبه، الحمد لله على كل حاجة.