في المنوفية.. فريق عمل يقدم مشروع "تاروفيدا" لتحويل كل جزء من القلقاس لمنتج له قيمة حقيقية

تاروفيدا.. من قلب المنوفية رجعنا الحياة للقلقاس

في إيناكتس جامعة المنوفية الرحلة بتبدأ من المشاكل الحقيقية في القرى.

ومن هنا نزلنا لأكتر من ١٠ قرى، وسافرنا أكتر من ٣٠٠٠ كيلو لحد ما وصلنا لقلب المنوفية

قرية شنوان المعروفة إنها من أكبر مناطق زراعة القلقاس في مصر.

هناك اكتشفنا إن المشكلة مش في زراعة القلقاس المشكلة كانت في اللي بيحصل بعد الحصاد.

أطنان من مخلفات القلقاس كانت بتتساب في الشوارع لحد ما تنشف، وبعدها تتحرق أو تتترمي في المياه فتتحول من محصول مليان خير إلى مصدر للتلوث.

ومش بس كده حتى القلقاس نفسه  أي خدش أو شكله لو مش مثالي  كان الفلاح بيضطر يبيعه بأقل من قيمته أو يتخلص منه.

ومن هنا بدأ مشروعنا تاروفيدا ؛ لأننا مؤمنين إن كل حاجة تستحق حياة جديدة.

بدأنا نحول كل جزء من القلقاس لمنتج له قيمة حقيقية.

دارنا

لبن نباتي طبيعي 100%، خالي من اللاكتوز، وبيستفيد من أجزاء كان مصيرها الهدر.

هيدروجيل

مادة مستدامة مصنوعة من مخلفات القلقاس، بتساعد على تقليل استهلاك المياه وتحسين كفاءة الري.

وريقة

مشروب طبيعي من أوراق القلقاس، اللي كانت بتترمي رغم إنها غنية بالعناصر الغذائية ومضادات الأكسدة.

جلد مستدام

بديل جلد مصنوع من ساق القلقاس، بيقدم حل مستدام يقلل الاعتماد على الصناعات الملوثة، ويحول المخلفات الزراعية لمادة لها استخدامات كتيرة.

تاروفيدا بالنسبالنا مش مجرد مشروع  دي محاولة إننا نغير نظرتنا لمخلفات محصول زراعي كامل ونحولها لقيمة اقتصادية وبيئية حقيقية.

نقلل التلوث الزراعي ونرفع قيمة المحصول ونساعد الفلاح يحقق استفادة أكبر من أرضه ونخلق بدائل مستدامة من موارد موجودة بالفعل.

ويمكن الغريب إن زمان مكنش القلقاس من الأكلات اللي بنحبها أو حتى بنفكر فيها

لكن النهارده بقينا شايفين فيه حياة جديدة لكل جزء فيه وقيمة ممكن تبدأ من حاجة كان مصيرها الهدر وده كان السبب اللي خلانا نسميه تاروفيدا.

رحلتنا بدأت من قرية في المنوفية ووصلت بينا للتأهل ضمن 35 جامعة للمنافسة في مسابقة إيناكتس الوطنية وطموحنا اننا ننافس على مستوى العالم .

ولسه مؤمنين إن البداية الحقيقية لأي تغيير بتكون من الأرض.

محمود محمد نايل - رؤى سامح -نهى عماد فريد - نغم محمد فهمى - سيف ياسر - صفا مكاوى - روان المصليحى - مريم محمد - سهر منير.