بسبب سوء فهم.. محمود الليثي يستعيد كواليس أغرب مشاجرة في فترة المراهقة

حل الفنان محمود الليثي، ضيفًا على الإعلامي إبراهيم فايق في بودكاست "فايق ورايق"، حيث استعاد ذكريات طريفة من مراهقته. وروى الليثي تفاصيل أغرب مشاجرة دخل فيها نتيجة سوء فهم، والتي انتهت بنتائج غير متوقعة بالنسبة له.

بدأ الليثي حكايته قائلاً: "مرة كنت خارج من المدرسة، وعديت قدام بيت واحد صاحبي، اللي مكانش حضر المدرسة اليوم ده، فلقيته واقف قدام بيته مع شلة من أصحابه، وكان من الناس اللي بحبها جدًا ومقرب ليا، قلت له بكل عفوية: 'عامل إيه؟ وأمك عاملة إيه النهارده؟'، قصدي أسأل لو عاملة أكل حلو عشان آجي آكل عندهم، لكنه فهم الكلام بشكل غلط تمامًا".

وتابع الليثي ضاحكًا: "لقيته فجأة بيقول لي: 'قلت إيه؟'، فقولتله: 'إيه يله.. في إيه؟!'، وفجأة لقيت 3 أو 4 أنفار محاوطين عليا وضـربوني جامد جدًا. حسيت إني في مشهد من فيلم، زي لما الأبطال بيتلم عليهم ناس في السينما، لحد ما فقدت القدرة على رؤية أي حاجة، وأثناء الخناقة لقيت بيضة مطقـوشة على وشي مش عارف جت منين. كنا واقفين عند كشك، فحد تقريبًا خد بيضة وضربني بيها! كنت حزين جدًا على نفسي".

طلب النجدة والموقف يتفاقم:
بعدما انتهت المشاجرة، لجأ محمود الليثي إلى أحد أصدقائه لمساعدته، موضحًا: "كلمت صاحبي وقلتله: 'الحقني، أنا اتضـربت'. وصل في 5 دقايق رغم إن المسافة بعيدة، وجاي على موتوسيكل. أول ما وصل، رمى الموتوسيكل على الأرض وقال لي: 'فين هو؟'. دلّيته على صاحبي اللي ضربني، وأنا مكنتش شايف اللي بيحصل بسبب الخناقة".

لكن الأمور لم تسر كما توقع، حيث قال الليثي: "صاحبي اللي جبتُه معاه مطوة، وأثناء ما كنت بحاول أحجزه وأمنعه من إنه يضـرب حد، المطوة جات على حاجبي بالغلط! لقيت نفسي مـضـروب مرتين؛ مرة في الخناقة الأساسية، ومرة من صاحبي اللي جاي ياخدلي حقي".