مديرة مدرسة كابيتال لوزير التعليم: بتدوروا علي أي سبوبة

الإثنين، 20 يناير 2025 01:39 م

وزير التعليم في مدرسة كابيتال

أسامة محمد

أبدت نرمين محمد، مديرة مدرسة كابيتال الدولية، اعتراضها على قرار وزير التربية والتعليم والتعليم الفني، بوضع المدرسة تحت الإشراف المالي والإداري، بعد واقعة إعداء الطالبات على طالبة والتسبب في كسر أنفها.

وقالت مديرة المدرسة: "تم وضع مدرسة كابيتال الدولية تحت الإشراف المالي والاداري ليه عشان حصلت خناقة بين بنتين واحدة شتمت (كارما) والتانية ردت الشتيمة وضربت (راوية) ونتج عن الضرب شرخ في الأنف .

وأضافت في منشور لها عبر صفحتها الشخصية على موقع التواصل الاجتماعي فيسبوك: "قامت الدنيا ما قعدتش وتحولت الخناقة لقضية رأي عام، علي الرغم ان إدارة المدرسة حولت ملف راوية الليثي من سنتين للوزارة عشان يتم فصلها فصل نهائي عشان برضه واقعة ضرب ولم يتم قبول الطلب، واتقالنا دوركم تربوي قبل التعليم، وقمنا بدورنا وقومنا سلوك البنت لمدة سنتين ما حصلش فيهم اي واقعة او مخالفة من البنت اللي كانت بتقوم بضبط النفس جداً عشان مستقبلها خاصة انها بنت متفوقة جدا دراسياً، وكان من المفترض انها هتقدم ورقها انهاردة في كلية الطب جامعة الجلاله قتقوم بنت من 6 grade تتخانق مع اختها وتشتمها بالام، فتلجأ البنت لاختها الكبيرة اللي هي راوية عشان تجبلها حقها خاصة ان كارما اطول واعرض منها وده اللي سمح لها بالتسلل لمنطقة ال High School اللي ما كنش المفروض تكون فيها، وتسمع راوية شتيمة أمها بودنها فتنهال علي البنت بالسب والضرب وما تقدرش تتمالك اعصابها ويروح مجهود سنتين معاها من العلاج والتدريب علي ضبط النفس ويضيع مستقبلها كله، بسبب نشر الفيديو اللي هيج الرأي العام وقوم الدنيا وما قعدهاش فيضيع مستقبل البنات، وتتحول المدرسة للإشراف المالي والاداري والسؤال هنا هي المدارس اللي تحت الإشراف المالي ما بيحصلش فيها خناقات ولا تجاوزات وماشية ع الخط المستقيم ولا انتم بتدوروا علي أي سبوبة.