رضوى الشربيني تفتح النار على حسام حبيب: ابعد عن شيرين طالما شيرين بهذا الجنون

هاجمت الإعلامية رضوى الشربيني، الفنان حسام حبيب، بعد أزمة تعديه على الفنانة شيرين عبد الوهاب، مشيرة إلى أن ليديها أدلة وإثباتات فيما يخص شيرين وكانت ترفض الإفصاح عنها.

وقالت رضوى الشربيني في فيديو لايف عبر صفحتها بموقع فيس بوك: "ابعد عن شيرين طالما شيرين بهذا الجنون وفضحت نفسها علشان تلبسك قضايا، وخايف أوي على بنتها؟ ولو خايف أوي كده ليه لما سهرتم في بيروت من سنة والبنت كان عندها 12 سنة، وكنت مقعدها معاكم على نفس التربيزة في سهرة ما ينفعش بنت صغيرة تقعد فيها، ليه ما قالتش ليها عيب يا شيرين؟"

وأضافت: "بيقول في التسجيل الصوتي إذا كنت أنا واخد 5 آلاف دولار، فهي جيباهم منين ولو مش كده نشوف الأموال العامة هتعمل ايه معاها.. هل ده يعقل؟".

وتابعت رضوى الشربيني: "أنت قبل ما تتجوز شيرين كانت نجمة النجوم في الغناء وكانت عاملة برنامج مكسر الدنيا ومسلسل مكسر الوطن العربي، وكل الناس بتشيد بتمثيلها وشيك في لابسها وشكلها منمق وواخدة بالها من أكلها وجسمها ومحدش عمره سمع عنها فضايح، وعمرنا ما شفنا راجل فضحها بالطريقة دي، أنت شايف سبتها عاملة إزاي؟ كام كيلو؟ مش قادرة تمشي ولا تلبس بعد 5 سنين بقيت فوق الـ100 كليو، وحلقت شعرها ومرة قصت شعرها والست تعبت وما بتشتغلش والفيديو يقطع القلب ومنهارة، والجمهور يتكلم وقصة شيرين وحسام ما بتخلصش وأصبح مسلسل أجزائه مملة وسخفية وناوي على إيه أكتر من كده؟ الست خلصت.

وأكدت رضوى الشربيني أن لديها إثباتات وأدلة في واقعة التعدي على شيرين عبد الوهاب قائلة: "أنا عندي أدلة وإثباتات في القصة دي، ومكنتش حابة اتكلم بس طالما أنت طلعت وقلت كده يبقى لازم اتكلم".

وناشدت رضوى الشربيني لإنقاذ شيرين عبد الوهاب قائلة: "حد ينقذ شيرين، شيرين محتاجة تتعالج وحد يقف معاها، كلام السوشيال ميديا مش هيعمل فيها حاجة، شيرين محتاجة تتعالج علشان المنظر اللي شفناه يقطع القلب، وأنا مش طالعة ادافع عن شيرين ولا المحامية بتاعتها".

ووجهت رضوى الشربيني تساؤلًا لـ حسام حبيب: "ما علجتهاش ليه لو بتحبها أوي كده؟ كانت بتسمع كلامك وبتقول إنها زي بنتي وأنا زي بابها كنت مستني إيه؟ وقفشت ليه على أخوها لما فكر يعالجها، شيرين خسرت كل الناس ومامتها وأهلها والشركة اللي كانت بتشتغل معاها ونفسها وبناتها مستني تخسر إيه تاني".