إسلام خليل يهاجم البحراوي: الأغاني اللي اتعرفت بيها مش بتاعتك

خرج الشاعر إسلام خليل، عن صمته وهاجم الفنان رضا البحراوي، لأنه غنى أغاني ليست له في الأفراح، معتبرا هذا تعديا على حقوقها الفكرية والملكية، كما أشار إلى أنه يجب أن يصنع أعماله الخاصة به، لأن الاستيلاء على أغنية ليست له يعتبر قطعا في الرزق لبعض المطربين.

 شارك إسلام خليل متابعيه مقطع فيديو عبر حسابه الشخصي بموقع تيك توك، جاء فيه: يا أستاذ رضا في حاجة اسمها حقوق الملكية الفكرية الكلمة زي الفلوس والدهب، لما تتاخد بدون وجه حق فدي سرقة، وأنت المفروض بقيت نجم وبقى ليك اسم، والمفروض تصرفاتك تكون قد النجومية اللي بقيت فيها.

وأضاف إسلام خليل: اطلب منى أغنية وأنا هكتبهالك هدية، لو مش عايز تدفع حقها، وأنا غني عن التعريف بأعمال الكتير اللي قدمتها كفاية تاريخي الطويل مع الفنان شعبان عبد الرحيم وكل ألحان الفنان شعبان عبد الرحيم مسجلة في جمعية المؤلفين والملحنين باسمي، ولا أنت غاوي الناس ترفع عليك قضية، أنا عارف إنك لسه دافع مبلغ بسبب لحن قديم أنت غنيته وابنه خد منك فلوس.

اختتم إسلام خليل حديثه قائلًا: إذا كان عدوية عبد الرحيم زعلان أن أغنيته اللي هو تعبان فيها ومسجلها وطالع عينه وعايز الغنوة تتعرف علشان يشتغل أنت غنتها، إزاي تستحوذ على أغنية مش ملكك كأنك بتقطع عيش الناس، دا مينفعش المفروض أنت اللي تساعد طالما بقيت نجم، أنا مستني منك الرد إنك تقول مش هعمل كدة تاني، لأن الأغاني اللي أنت حتى اتعرفت بيها مش بتاعتك، اعمل لنفسك تاريخ وسجل أغاني يبقى عندك رصيد لكن هتعيش على أغاني الناس