حمادة عبد اللطيف: الأهلي لا يفوز بالحكام.. والمظلومية شماعة الفاشلين

فتح حمادة عبد اللطيف، نجم الزمالك السابق، النار على من يروجون لفكرة أن النادي الأهلي يفوز بمساعدة التحكيم، مؤكدًا أن هذه الرواية لا تصمد أمام الواقع والأرقام.

وقال عبد اللطيف في تصريحات مثيرة:"من أول يوم دخلت فيه نادي الزمالك وأنا عندي 15 سنة، كنت بسمع الكلام المتكرر عن إن الأهلي بيكسب بالحكام. كنا رايحين نلعب ماتش في الناشئين، والمدرب وبعض المسؤولين قالوا لنا: خلّوا بالكم الحكام هيجاملوا الأهلي".

وأضاف:"لعبنا المباراة، وكنا موفقين وكسبنا الأهلي، والحكم كان ممتاز جدًا وماحسيتش بأي ظلم، بعدها بدأت أشوف إن كل ما نخسر، يقولوا الحكام جاملوا الأهلي، طب ما انت كسبت قبل كده، ليه محدش قال إن الحكم جامل الزمالك؟".

ووصف عبد اللطيف هذه النغمة بـ"السخيفة والمكررة"، قائلًا:"هل من المعقول إن الأهلي يكسب 45 بطولة دوري ونتهم الحكام؟ يعني هو ما بيلعبش ومعندوش نجوم؟! الأهلي كمان كسب 39 بطولة كأس مصر، في حين إن الزمالك عنده 29 بطولة، هل الزمالك هو كمان كسب بالحكام؟".

وأكد نجم الزمالك الأسبق على أهمية الإنصاف والاعتراف بالحقائق:"أنا بحب الكلام الموزون، بالعقل مش بالعاطفة ولا الانتماء. الأهلي كسبان 12 بطولة دوري أبطال إفريقيا، والزمالك ما أخدهاش من 23 سنة، وده شيء يحزنني كزملكاوي، لكن مش لازم نغطي على فشلنا بشماعة التحكيم".

وشدد عبد اللطيف على أن التحكيم قد يخطئ في بعض الأحيان، لكنه ليس السبب في إنجازات نادٍ بهذا الحجم:"ممكن يحصل مجاملة مرة أو مرتين، خصوصًا للأندية الكبيرة زي الأهلي والزمالك، لكن مش كل البطولات! الكلام ده لا يُعقل، ولا يقوله إلا شخص بيهرب من الواقع".

وأنهى حديثه برسالة واضحة:"أنا بقول الحق ومبخافش إلا من اللي خلقني، ومبحبش حكاية المظلومية اللي عايشين فيها بعض مسؤولي وجماهير الزمالك. لما كنت كويس، أخدت إفريقيا والدوري ومحدش ظلمك. لكن فيه ناس بتغير الحقيقة عشان فشلهم، وده اللي مش لازم نسكت عليه".