سائق التوكتوك يكشف خطة المتهمين في بولاق الدكرور| خاص

حصل موقع “المصري الآن” على أقوال سائق التوكتوك الذي استقله المتهمان في واقعة مقتل سيدة داخل منزلها بمنطقة بولاق الدكرور، حيث أدلى بشهادته أمام جهات التحقيق بنيابة جنوب الجيزة الكلية، كاشفًا تفاصيل تحركاتهما قبل وبعد ارتكاب الجريمة، وكيف قاما بالتنكر في ملابس نسائية وارتداء نقاب أثناء استقلالهما التوكتوك، وصولًا إلى موقع الحادث، في محاولة لإخفاء هويتهما.

وجاءت أقواله كالأتي:- 

س/ ما إسمك وسنك وطبيعة عملك؟

إسمي/ السيد أحمد السيد أحمد

سني/ ١٧ سنة 

أعمل/ سائق توكتوك

مقيم/ شارع شحاته مراد - زنين - بولاق الدكرور ولا أحمل رقم قومي

س/ ما صلتك بكلاً من المتهمان ١- / حسن محمد إسماعيل محمد جوده ، ٢- / فراج علم الدين محمد علم الدين؟

ج/ حسن انا عارفه من زمان عشان كان معاه توكتوك وكان مشغله في الموقف اللى أنا شغال فيه انما اللى اسمه فراج انا معرفوش وأول مرة اشوفه كان لما كان مع اسلام في اليوم اللي حصل فيه المشكلة.

س/ وما هي طبيعة العلاقة فيما بينكما وهل من ثمة خلافات؟

ج/ لا، العلاقة مجرد معرفة يعني ومفيش بيننا خلافات ولا أي حاجة.

س/ إذاً ما معلوماتك بشأن الواقعة محل التحقيق؟

ج/ هو اللى حصل انى شغال سواق توكتوك في موقف الطابق ببولاق الدكرور وانا واقف هناك لقيت حسن جالى وراح ندالى وقالى انه عاوزنى اروح معاه مشوار فانا سالته ايه هو المشوار قاله انه لى ورق عند مراته الثانية وعاوز اجيبه فانا قولتلو ماشي وراح واخد رقمي وقالى هكلمك كمان ساعة وهقولك هنتقابل فين وفعلا بعد حوالي ساعة كلمنى وقالى تعالى عند الشوربجى وفعلا روحتلو وكان معاه اللى اسمه فراج واحنا ماشيين لقيته راح مطلع هدوم من شنطة كانت معاه ويبدأ يلبس هو واللى اسمه فراج فانا سالته انت لى بتعمل كدا قالى عشان مش عاوز حد يشوفنى ووصفلى امشى إزاي لحد وما وصلنا عند ميدان الجمهورية وراح قالى نزلنا عند البيت اللى تحت القهوة وفعلا رحت قدام البيت وراحو نزلو ودخلو البيت ومشيت وبعد حوالي نصف ساعة لقيت اسلام كلمني وقالى تعاله عند البيت اللى نزلنا عنده عشان تاخدنا وفعلا رحتلهم وأول لما وصلت عند البيت لقيت اللى اسمه فراج نزل الأول ووراه حسن ورحنا مشينا لحد ما وصلتهم عند الرشاح ومشيت وهو دا كل اللى حصل.

س/ متى وأين كان ذلك؟

ج/ الكلام دا حصل يوم الاحد الموافق ٢٠٢٦/١/١٨ أول لما اسلام جالى اول مرة كانت الساعة حوالي ٨:٠٠ الصبح وكنت ساعتها في موقف الطابق ولما حسن كلمني ورحتلهم كانت الساعة حوالي ٩:٣٠ صباحا في شارع الشوربجي ولما وصلنا عند البيت كانت الساعة حوالي ١٠:٣٠ صباحا بميدان الجمهورية ولما رحتلهم ثاني مرة لما اسلام كلمني كانت الساعة حوالي ١١:٣٠ صباحا.

س/ وضح لنا كيفية اتفاق المتهم/ حسن محمد إسماعيل محمد جوده - معك؟

ج/ هو وانا شغال لقيت حسن جالى وراح ندالى وقالى انه عاوزنى اروح معاه مشوار فانا سالته ايه هو المشوار قاله انه لى ورق عند مراته الثانية وعاوز اجيبه فانا قولتلو ماشي وراح واخد رقمي وقالى هكلمك كمان ساعة وهقولك هنتقابل فين وفعلا بعد حوالي ساعة كلمنى وقالى تعالى عند الشوربجى وفعلا روحتلو وكان معاه اللى اسمه فراج.

س/ وهل من مقابل مادي نظير ذلك الاتفاق؟

ج/ هو قالي انه هيرضيني بس متفقش معايا على فلوس.

س/ وهل قمت بالانصياع الى مطلبه؟

ج/ ايوة.

س/ ولم؟

ج/ أنا قولت أساعدة وبعدين قولت حرام هو ليه ورق وهو ومراته أحرار يعني مفيش حاجة غلط وبالنسبة للفلوس دي مش مقابل حاجة دي مقابل العطلة والمشوار لإني وقفت شغل بالتوك توك على حسه وعمتاً أنا بعد المقابلة فضلت شغال لحد ما حسن كلمني وقالى انى اروحله.

س/ وإلى أين توجهت آنذاك؟

ج/ هو قالى الى أروحه آخر شارع الشوربجى.

س/ وما الذي ابصرته تحديداً حال وصولك بالمكان المتفق عليه؟

ج/ أنا أول لما وصلت لقيت حسن وكان معاه اللى اسمه فراج وكان ساعتها حسن راكن العربية بتاعته آخر الشارع وراح نزلو منها وجم ركبو معايا التوكتوك.

س/ وهل من ثمة حوار دار بينك وبين سالفي الذكر؟

ج/ هو اول لما ركبو معاي لقيت حسن بيقولي رايك أتنكر ولا ايه فانا قولتلو انت لى هتتنكر طالما انت رايح عند مراتك ومش رايح تعمل حاجة غلط غير انك رايح تجيب حقك لقيت اللى اسمه فراج رد عليه وقاله لا يا عم احنا نتنكر أحسن.

س/ صف لنا كيفية تنكر سالفي الذكر آنذاك؟

ج/ واحنا ماشيين كان ساعتها حسن معاه شنطة ولقيته راح مطلع منها هدوم فانا في الأول مكنتش واخد بالي هي ايه لحد لما حسن ادا هدوم لفراج وبدأ يلبس لقيت ان الهدوم دي طلعت نقاب وبعدها لقيت حسن لبس نفس الهدوم.

س/ صف لنا طبيعة تلك الملابس؟

ج/ هو فراج لقيته لبس جلبية وكان لونها موف ولبس فوقيها خمار وراح لابس نقاب لونه اسود وبعدها لقيت حسن لبس جلبية سودا ولابس عليها طرحة وراح لبس النقاب وكان لونه اسود برده وقالولي أمشي بالتوكتوك.

س/ وإلى أين؟

ج/ انا مكنتش عارف طريق البيت بتاع مراته اللى كان قالى عليه هو فضل يوصفلى انى اخش من هنا لهنا لحد ما وصلنا عند ميدان الجمهورية بزنين ووقفنا عند بيت وكان تحتيه قهوة.

س/ وما التصرف الذي بدر من سالفي الذكر آنذاك؟

ج/ أنا اول لما وصلت عند البيت لقيت حسن نزل وفتح الباب ودخل وراه فراج والاثنين ساعتها كانو لابسين الهدوم الحريمي والنقاب.

س/ وما هي حالة المارة بمكان الواقعة آنذاك؟

ج/ ايوة كان في ناس كتير في الشارع عشان في وش باب العمارة في فرن عيش وكان زحمة.

س/ وما التصرف الذي بدر منك عقب ذلك؟

ج/ انا مشيت وساعتها حسن قالى انه هيكلمنى بعد ما ينزل.

س/ وهل قام المتهم/ حسن محمد إسماعيل محمد جوده - بمهاتفتك؟

ج/ ايوة.

س/ وما مضمونها؟

ج/ هو قالى انت فين قولتلو انا شغال راح قالى طب تعالى عند البيت اللى انت نزلتني فيه.

س/ وما هي المده المستغرقة بين توصيلك للمتهمان بمكان الواقعة ومهاتفتك؟

ج/ حوالي خمسة وعشرون دقيقة تقريباً.

س/ وما الذي حدث بعد ذلك؟

ج/ انا اول لما وصلت تحت البيت لقيت حسن نزل الأول ومكنش لابس الهدوم اللى كان داخل بيها البيت في الأول وبعده نزل فراج ولابس نفس الهدوم الحريمى اللى كان داخل بيها البيت في الأول.

ملحوظة: حيث قمنا بعرض حرز الملابس المضبوطة بحوزة المتهمين على الماثل أمامنا فأقر الماثل بأن تلك الملابس هي الملابس التي كان يرتديها المتهمين حال ركوبهم الدراجة البخارية "التوكتوك" رفقتي وحال توصيلهم لمكان حدوث الواقعة.

س/ وما التصرف الذي بدر منك عقب ذلك؟

ج/ هما اول لما ركبو معايا مشينا على طول لحد لما حسن قالى وصلنا عند الرشاح ولما وصلنا لقيت فراج راح قالع الهدوم اللى كان لابسها وراح حطها في شنطة وساعتها حسن قاله خليهم في التوكتوك وانا ساعتها قلتلهم محدش يسيب حاجة هنا وراحو نزلو وانا مشيت وهو دا كل اللى حصل.

س/ وبشأن ما شهدت به الآن بالتحقيقات وما المبلغ الذي تقاضيته من المتهم/ حسن آنذاك؟

ج/ هو إداني ٤٠٠ جنية حساب المشوار وبعد كدة لقيته إداني ١٠٠٠ جنية.

س/ وما صلتك بالمبلغ المالي المضبوط وقدره ١٤٠٠ جنية والسابق فضه ببداية التحقيقات؟

ج/ هي دي الفلوس اللي إسلام إدهالي.

س/ وملك من ذلك المبلغ؟

ج/ أنا كنت فاكرها فلوس إسلام بس بعد كدة عرفت إن إسلام سارقها.

س/ وهل ترغب في إستلام ذلك المبلغ؟

ج/ لا، الفلوس دي تروح لصاحب اللي مسروقة منه أنا مليش دعوة ومش عايزها.

س/ هل لديك أقوال أخرى؟

ج/ لا