حلمي عبد الباقي يناشد وزيرة الثقافة بالتدخل لحل أزمته ويهاجم مصطفي كامل

طالب الفنان حلمي عبد الباقي، من وزيرة الثقافة الدكتورة جيهان زكي، التدخل في أزمته الأخيرة مع الفنان مصطفى كامل، نقيب المهن الموسيقية.

ونشر عبد الباقي مقطع فيديو له عبر صفحته الشخصية موقع التواصل الاجتماعي «فيس بوك»، قال من خلاله: "أنا بقالي فترة ملتزم الصمت تمامًا ومبتكلمش في أي حاجة مع إني شايف حملة ممنهجة لتشويهي وبقول بكرة الحق يبان، سكت كتير وتحملت ما لا يتحمله بشر، وبشوف وبسمع التشويهات اللي عمري ما أتخيل إنها تتقال عن حلمي عبد الباقي، ولكن ده اللي حصل، عايز أقول إن المخالفات العلاجية اللي عندي حولوها على جهاز الكسب الغير مشروع".

وتابع: "موضوع غريب جدًا وعلى حد علمي لو حد خبير في القانون يقولي إن جهاز الكسب غير المشروع بيروحه الحرامي والمرتشي واللي بيتكسب من كرسيه ويتربح من تحت لتحت، إنما واحد تجاوزات علاجية بتروح للمستشفيات، ومع ذلك امتثلت أمام اللجنة الموقرة في التحقيق وهما هيكتبوا تقريرهم قريب".

وأضاف: في الجلسة الأخيرة شوفت تعنت غريب جدًا، أول ما قعدنا قالوا في مطالبة من مستشفى لسه جيالنا بأن في جواب أنت عامل له إعفاء لواحدة هتعمل عملية في عينها وأنت عامل لها إعفاء والجواب ده جالنا من أيام، أيام إيه الجواب ده من شهر 11 سنة 2024، يعني كلام غريب جدًا والمستشفى مبعتتش المطالبة من سنة و4 شهور؟، طيب إزاي؟، لأ هو الموضوع دوروا لحلمي على أي مصيبة تاخده، ومع ذلك أنا افتكرت كويس جدًا الجواب ده كنت اتكلمت مع النقيب وشخص كمان واتكلمنا والنقيب قالي الست دي غلبانة ونساعدها وعملت الجواب، ولما عملنا اطلاع على المخالفات.. الجواب ده مكنش موجود أصلًا، طالع دلوقتي بأمارة إيه؟، وحصل إنكار ومش عايزين يكلموا الشخص اللي كان معانا في المكالمة.

وأشار"في إقصاء لحلمي عبد الباقي إنه ميدخلش انتخابات سواء عضو مجلس أو يرشح نفسه نقيب وده حق شرعي لأي حد، وأنا تم إيقافي من أكتر من 3 شهور بأني لم أمارس مهامي النقابية دون أن يثبت عليا أي إدانة، هو أنا موظف؟، أنا عضو مجلس لما تثبت إداتني وقفني أو اشطبني من النقابة، أنت موقفني ليه بقالك 3 شهور؟، هو ده قانون؟.

واختتم حلمي عبد الباقي حديثه قائلا: "أنا مطلوب إقصائي من الانتخابات اللي جاية لا عضو مجلس ولا نقيب، أنا بتعرض لظلم وقهر بشكل غير طبيعي ولكن بقول اللي ربنا عايزه هو اللي هيكون".

كما علق حلمي عبد الباقي على الفيديو قائلا: “مناشدة لرئيس الجمهورية ووزيرة الثقافة ورئيس مجلس الدولة متابعة مايحدث من انتهاكات في حقي لمنعي من الترشح في الانتخابات القادمة”. 

اقرأ أيضا:

محمد صلاح العزب يكشف عن تعاون يجمع محمد إمام وأحمد العوضي.. تفاصيل