أحمد فتوح: بنتي فرح بتبتزني عشان مفيش غيرها

كشف الفنان أحمد فتوح، في البرنامج التلفزيوني “تفاصيل” عن بعض من ذكرياته العائلية، وبعض المواقف المؤثرة فى حياته، وعن علاقتة بابنته الوحيدة.

وقال فتوح أحمد، خلال استضافته فى برنامج «تفاصيل» مع الإعلامية نهال طايل، والمذاع عبر قناة «صدى البلد 2»، إن لديه بنتًا وحيدة تسمى فرح، مضيفا: «فرح دي بتبتزني وبتعاملني كأني مليونير عشان مفيش غيرها، وبقولها يا حبيبتي أنا مش نجيب ساويرس، أيوه أنا مش نجيب يا حبيبتى، الحمد لله الحمد لله والله إحنا أحسن من غيرنا كتير، الصعايدة عموماً ما بيظهروش حنيتهم، يعنى بيبقوا جادين، وأنا بالنسبة لفرح مش عاوز أعلقها بيا لأنها جات على كبر وأنا مش قاعد ليها كتير».

وأضاف«أنا محبتش أربطها بيا، وحاسس إني مش هقعد معها كتير بالشكل ده، فبصراحة مش عايزها ترتبط بيا، عايزها تبقى قوية وتعتمد على نفسها عشان تقدر تكمل، رغم إني مش خايف عليها، لأن عندي إخواتى وولادهم، العيلة عندنا كبيرة أوى، إحنا ما شاء الله تقريبًا 600، الله أكبر، ليها عزوة وليها ضهر، وأنا معايا 11 أخ».

واختتم حديثه قائلًا: «عمرهم ما بخلوا عليا بحاجة، بس المهم إنك تفكر فى نفسك، إيه أكتر حاجة بتشغلك فى المستقبل؟ بتخاف من إيه؟ النجاح إنك تبني نفسك واسمك، تعبك، ومسؤوليتك، دي كلها حاجات بتبين شخصية الإنسان».

وأوضح الفنان فتوح أحمد، أنه عندما قابل الفنان الراحل أحمد زكي قال له نصًا: «أنت فنان.. زيى أنا، بس مكانش يقصد حاجة وحشة ولكن معنى الكلمة دي إنى مش باعمل حساب لكل خطوة وبامثل وباسيب نفسى للى بيحصل».