حازم إمام يعلق على نجاح صفقات الزمالك الجديدة

علق حازم إمام، نجم نادي الزمالك الأسبق، على صفقات الفريق الجديدة، واستعدادات الموسم الجديد، وقال في تصريحات إذاعية: إن "الزمالك جاب حوالي 10 لاعيبة وقدر يسوق أحمد الجفالي في نادي أبها السعودي ودي خطوات جيدة".

أضاف: "الناس شايفة إن في لاعيبة كتير جت، بس من وجهة نظري يمكن الوحيد اللي هيبدأ أساسي بكره قدام سيراميكا كليوباترا هو شيكو بانزا، والباقي هما نفس اللاعيبة اللي كانوا موجودين الموسم الماضي".

وأوضح: "السنة اللي فاتت مكنش فيه دكة، السنة دي فيه دكة كويسة، بس في لاعيبة مش هتاخد فرصتها في الأول، وهيدخلوا واحدة واحدة أنا معنديش معلومة والله انا بقول وجهه نظري".

وأكمل: "وجهة نظري، ومش عندي معلومة مؤكدة، إن شيكو بانزا هو اللي هيبدأ بكرة ناحية الشمال أو اليمين، حسب ما المدرب هيشوف والناحية التانية ممكن يكون فيها ناصر ماهر"

وأشار: "ناصر منسي هو اللي ممكن يبدأ الماتش بكرة، مش عارف سيف الجزيري حالته إيه، مع إنه ماشي كويس في الماتشات، لكن أتوقع منسي يبدأ".

وأختتم: " في مركز الباك اليمين عمر جابر، والشمال بنتايك، مفيش تغييرات كتير اظن كل ده من وجهة نظري، والله أعلم".

11 صفقة جديدة و7 راحلين.. تفاصيل ميركاتو الزمالك الصيفي 2025

أعلنت إدارة نادي الزمالك رسميًا، عن التعاقد مع مجموعة من اللاعبين لتدعيم مختلف المراكز، سواء من خلال الانتقال الحر أو الصفقات النهائية. وشملت القائمة أسماء متنوعة ما بين لاعبين أصحاب خبرة وآخرين شباب واعدين، وجاءت التعاقدات كالتالي:

المهدي سليمان (حارس مرمى – انتقال حر)

محمد إسماعيل (مدافع – من نادي زد)

أحمد ربيع (خط وسط – من البنك الأهلي)

عبد الحميد معالي (جناح مهاجم – من اتحاد طنجة المغربي)

آدم كايد (جناح مهاجم – من بريدا الهولندي)

شيكو بانزا (جناح مهاجم – من إستريلا أمادورا البرتغالي)

عمر فرج (مهاجم – عودة من الإعارة)

أحمد شريف (مهاجم – من فاركو)

عمرو ناصر (مهاجم – من فاركو)

عُدي الدباغ (مهاجم – من شارلروا البلجيكي)

رغم التعاقدات العديدة، لم يُغلق الزمالك باب الانتقالات بعد. حيث تواصل إدارة النادي مفاوضاتها مع نادي بتروجيت لضم لاعب الوسط الفلسطيني حامد حمدان، إلا أن المفاوضات لا تزال معلقة بسبب تمسك النادي البترولي باللاعب. في الوقت ذاته، تتردد أنباء عن محاولات من القلعة البيضاء لاستعادة المهاجم الدولي مصطفى محمد من نادي نانت الفرنسي.