أول تعليق من تامر حسني بعد رد وزارة الصحة على جدل

وجه الفنان تامر حسني، الشكر لكل من دعم مناشدتة التي وجهها لوزارة الصحة وبعض الدكاترة الكبار لتوضيح بعض الحقائق عن الغذاء الصحي بعد انتشار أقوال متضاربة حول الحالة الغذائية مؤخراً.

كتب تامر حسنى، رسالة عبر حسابه على «إنستجرام»، كل الشكر لكل دكتور محترم، وكل إعلامى وصحفى محترم، وكل شخص محترم على السوشيال ميديا أيد مناشدتى وأسئلتى الطبيعية».

تابع: «وأسئلتى الطبيعية اللى كل الشعب كله نفسه يعرفلها إجابة بخصوص الفتنة الغذائية اللى بقينا عايشين فيها».

وكان  تامر حسنى وجه  مناشدة إلى وزارة الصحة المصرية، وعدد من كبار الأطباء والمتخصصين، مطالبًا بتقديم توضيحات علمية مبسطة للمواطنين بشأن الجدل المتزايد حول الأغذية المفيدة والضارة، فى ظل ما وصفه بـ«الفتنة الغذائية» المنتشرة حاليًا.

وكتب تامر حسنى عبر حسابه على «فيس بوك»: «فى ظل الفتنة الغذائية اللى حاصلة فى مصر وحديث كل الناس دلوقتى عن إيه المفيد لينا وإيه المضر هل ممكن أناشد وزارة الصحة المصرية وكبار الدكاترة المختصة وأصحاب المستشفيات بردود كافية فيها شرح مفصل عن إيه الأكل المفيد لينا وإيه اللى مش مفيد وياريت يكون شرحا مفصلا يفهمه الشخص العادى من غير أى مصطلحات طبية أجنبية؟».

وتابع: «أولاً الخضار أمثال الخس والجرجير وورق العنب وكل الورقيات مفيدة ولا لأ وإزاى نطمن إنها مش مرشوشة مواد تمرض الناس... ثانياً البيض والفراخ اللى فى بلدنا ناكله إزاى وإزاى نميز ونطمن إنه مش محقون وإزاى نعرفه لو محقون.. ثالثاً شرب المية بكثرة كما تعلمنا مفيد ولا لأ.. رابعاً الحليب مضر ولا كويس وإيه الصح اللى نشربه.. خامساً الأدوية لازم تتاخد ولا مش لازم ولا مش أى أدوية تتاخد!».

وأكد: «أناشد وزارتنا المصرية تعملنا ڤيديوهات حد يطلع يكلمنا بالعامية ويرد بالتفصيل وبالأدلة العلمية على كل ده وياريت يساعدنى صديقى المحترم الأستاذ الفاضل أيمن عباس بما إنه صاحب أكبر المستشفيات ياريت يطلعلنا دكاترة من عنده مختصة يعملوا ڤيديوهات ترد على كل اللى حاصل فى مجتمعنا وبناشد برضو الدكتور العظيم مجدى يعقوب يدينا من خبرته العظيمة والدكتور الكبير حسام موافى ويساعدونا الفترة دى كشعب ويريحونا من الجدل الفظيع ده، لأن محدش بقى عارف ياكل إيه ومياكلش إيه وثوابت كتير اتغيرت بين يوم وليلة...أرجوكوا متسيبوناش كده لا إحنا ولا ولادنا».

اقرا ايضا: موعد عرض الحلقتين 3 و4 من مسلسل الفرنساوي