لميس الحديدي تحتفل بعيد ميلاد خطيبة نجلها نور

احتفلت الإعلامية لميس الحديدي، بعيد ميلاد خطيبة نجلها نور، برسالة طويلة عبرت فيها عن مدى حبها الشديد لها.

وكتبت لميس الحديدى، عبر "إنستجرام"«ناس كتير كانت بتسألني يا ترى أنا حماة عاملة إزاي؟ مسيطرة؟ متحكمة؟ باغير على ابني؟ والحقيقة إني كنت قلقانة جدًا مين اللى حتتجوز نور لأنه ابني الوحيد وأنا مرتبطة بيه جدًا وباعترف إني كنت دايمًا باقول له ماينفعش تحب حد أكتر من مامي».

وأضافت: «لكن كرم ربنا دايماً عليا كبير ونور جابل لي بنوتة حلوة حبيتها بسرعة مريم السطوحي.. وبقينا besties زي ماهى بتقول، خاصة إن نور ابني لسة مسافر بيشتغل بره، فهى بقت صاحبتى الصغيرة، وعوضتني عن غيابه».

وتابعت: «كأني ما صدقت يبقي عندي بنت فبقيت بافكر فيها وأنا بأعمل شوبنج، بأكلمها تلحقني مع تشات جى بى تى الساعه 3 صباحًا وتعمل لي سيرش لو عاوزة اكتب حاجة، احجزى لى سينما يا مريم، ونروح السينما سوا».

وأشارت إلى طبيعة علاقتهما قائلة: «إلحقي الزوم ميتنج مش عارفه اعمله، إلحقي تليفونى هنج.. محتاسين في توضيب البيت سوا، ده غير اننا شبه بعض فى حاجات كتيرة: التفاصيل، الدقة، التنظيم، حب الشغل لكن هي علشان مهندسة أشطر مني كتير».

واختتمت لميس الحديدى رسالتها قائلة: «النهارده عيد ميلاد مريم كل سنة وانتي طيبة حبيبتي، ربنا يحفظك يا رب، والسنة الجاية كل أحلامك وأحلام نور تتحقق وتكونوا في بيتكم إن شاء الله.. الحمد لله.. البنات الحلوين رزق».