لما جبريل عن عمرو دياب: محتاجين نمسك الخشب.. ونجاحه خارج حدود الزمن

قالت الإعلامية لما جبريل، خلال فقرتها في برنامج "الحكاية" مع الإعلامي عمرو أديب، المذاع على قناة MBC مصر، إن الفنان عمرو دياب نجح مجددًا في خطف الأنظار مع طرح ألبومه الجديد "حبيتك"، مؤكدة أن الهضبة أصبح بالنسبة للجمهور علامة ثابتة لبداية موسم الصيف.

لما جبريل: محتاجين نمسك الخشب عشان نجاح عمرو دياب.. وعمره ما حبس نفسه في زمن معين

وأضافت: “الصيف بدأ رسمي بتوقيع الهضبة، مع نزول ألبومه رقم 36 في مشواره الفني، واللي كل سنة بيأكد إن عمرو دياب حالة فنية استثنائية، الناس بتستناها من صيف لصيف.”

وتابعت: “كل سنة بنسأل نفس السؤال.. إيه سر الحالة اللي بيعملها عمرو دياب؟ وإزاي بعد كل السنين دي يفضل أول اسم الناس مستنياه أول ما الصيف يبدأ؟”

وأكدت أن سر نجاح الهضبة لا يرتبط فقط بالأغاني، وإنما بقدرته على الاستمرار والتجدد، قائلة: “إحنا بنتكلم عن فنان بدأ مع أجيال مختلفة، وشاف مدارس موسيقية كتير، وعدّى بأزمات اقتصادية وتغيرات كبيرة في صناعة الموسيقى، ومع ذلك كل سنة بينجح إنه يكون حاضر وبقوة.”

وأضافت: “عمرو دياب عمره ما حبس نفسه في زمن معين، بالعكس، بيعرف يخاطب كل جيل بلغته، وبيطور نفسه وشكله وموسيقاه، وده اللي مخليه محافظ على مكانته كل السنين دي.”

واختتمت لما جبريل حديثها قائلة: “يمكن دي أهم ميزة عند الهضبة... إنه كل سنة بيحط لنفسه هدف واحد، إنه يفضل نجم الموسم، ويفضل قادر ينافس نفسه قبل أي حد تاني. وعلشان كده بيبقى دايمًا السهل الممتنع، والمعادلة اللي لحد النهارده محدش قدر يكررها.”

يُذكر أن الإعلامية لما جبريل تقدم فقرة أسبوعية متخصصة فى متابعة أبرز «التريندات» على مواقع التواصل الاجتماعى ضمن برنامج «الحكاية»، حيث تستعرض أبرز الموضوعات التى تشغل الرأى العام وتفاعل الجمهور معها على مدار الأسبوع.